Duka i Sussex i ka bërë nderimet e fundit gjyshes së tij, Mbretëreshës së ndjerë Elisabeth II.
Në fjalën e tij, Prince Harry, tha se i është falënderues Mbretëreshës për angazhimin e saj gjatë mbretërimit, këshillat e shëndosha dhe “buzëqeshjen infektuese” që ajo kishte.
Duke bërë deklaratën e tij të parë që nga vdekja e saj, Princi Harry tha:
“Ne gjithashtu buzëqeshim duke e ditur që ju dhe gjyshi jeni ribashkuar tani”.
Ai tha se ishte mirënjohës për kujtimet që mban nga takimet e Mbretëreshës me “stërnipërit e saj të dashur”.
“Tani e nderojmë babanë tim në rolin e tij të ri si Mbreti Charles III”, shtoi ai.
Në deklaratën e tij, të shkruar në faqen e tij të internetit Archewell, Harry e përshkruan Mbretëreshën Elizabeth II si një “busull udhëzuese”.
“Hijeshia dhe dinjiteti i saj i palëkundur mbeti i vërtetë gjatë gjithë jetës së saj dhe tani trashëgimia e saj e përjetshme,” shtoi ai.
“Le t’i bëjmë jehonë fjalëve që ajo tha pas vdekjes së bashkëshortit të saj, Princit Philip, fjalë që mund të na sjellin ngushëllim të gjithëve tani: “Jeta, natyrisht, përbëhet nga ndarjet përfundimtare, si dhe takimet e para”.
Ai tha se Mbretëresha dhe Duka i Edinburgut, i cili vdiq vitin e kaluar, tani janë “të dy së bashku në paqe”.
“Gjyshe, ndërsa kjo ndarje përfundimtare na sjell trishtim të madh, unë jam gjithmonë mirënjohës për të gjitha takimet tona të para”, shkruan Harry.
“I vlerësoj kohët që kam kaluar me ju, dhe shumë momente të tjera të veçanta. Ju tashmë na mungoni shumë, jo vetëm ne, por gjithë botës.”
Vajza e tij një vjeçare mori emrin Lilibet, i cili ishte pseudonimi i Mbretëreshës i përdorur në familje, që kur ishte fëmijë.
