NATO-ja është e gatshme të rrisë numrin e trupave në Kosovë, nëse ka rritje të tensioneve në mesin e minoritetit serb, lidhur me vendimin e Qeverisë së Kosovës për regjistrimin e makinave me targa RKS – Republika e Kosovës. Kjo është bërë me dije nga zëvendëskomandanti i misionit të NATO-s në Kosovë (KFOR), Luca Piperni.
“Ne jemi vigjilentë dhe të gatshëm për të vepruar… nëse kemi rritje të tensioneve, mirëpo edhe mund të rrisim numrin e forcave rezervë, mund ta marrim këtë vendim brenda një kohe të shkurtër”, ka thënë Piperni.
Kujtojmë se situata në veri të Kosovës u tensionua më 31 korrik, një ditë para se Qeveria e Kosovës të niste zbatimin e vendimit për dokumentet për hyrje/dalje dhe regjistrimin e targave të makinave në RKS.
