Deputeti Agron Duka, drejtues i Partisë Agrare Ambientaliste, Agron Duka, ka apeluar sot për të gjitha palët që përbëjnë opozitën në vend që të bashkohen në një front për zgjedhjet lokale. Duke iu përgjigjur një thirrjeje të drejtuesve të PD në Mirditë, Duka tha se bashkimi është vullneti i të gjithë demokratëve.
“Kam ndjekur me vëmendje qëndrimin e demokrateve të Mirditës, të shprehur nga z. Alfred Duka, i cili nuk sintetizon vetëm vullnetin e tyre për bashkim përpara zgjedhjeve vendore brenda radhëve të Partisë Demokratike, por edhe një kambanë alarmi për opozitën në të gjitha grupimet e saj, pasi zgjedhjet vendore janë pak muaj larg dhe koha nuk pret. Përtej pakënaqësive midis palëve brenda PD-së, është jetike për vendin që ky ngërç të tejkalohet sa më parë në forcën kryesore të opozitës, sepse ndërkohë që ne nuk kemi nisur ende organizimin, Partia Socialiste e ka nisur fushatën. Përsëritja e gabimeve të së shkuarës do të ishte edhe më fatale, pasi qytetarët më shumë se kurrë, kanë nevojë të përfaqësohen nëpërmjet opozitës në institucionet e pushtetit vendor, sepse është e qartë për të gjithë që kjo mazhorancë nuk ka asgjë për të ofruar dhe vetëm çorganizimi ynë, lejon qëndrimin e saj në pushtet”, deklaroi Duka.
Duke nënvizuar edhe një herë mbështetjen për ndaj qëndrimit të demokratëve të Mirditës, Duka tha se ky vullnet duhet të përhapet në gjithë Shqipërinë.
