Vëllai i të ‘fortit’ të Shkodrës Safet Bajri, Ilri Bajri është liruar para një muaji nga burgu i Italisë. Ende nuk dihet se në ç’vend ndodhet aktualisht Bajri, i cili së bashku me vëllanë e fisin, u arrestua në Shkodër nga një megaoperacion policor në 2018.
Ilir Bajri, i njohur ndryshe edhe si Ilir Rustemi, u arrestua nga policia në kuadër të operacionit “Oaz” që goditi grupin “Bajri” në shtator të 2018-ës. Kërkesa për ekstradimin e tij erdhi nga Italia, pasi në vitin 2008-2009 gjykata e Bolonjas në Itali e ka gjykuar dhe dënuar me 5.6 vite burg për akuzën “trafik narkotikësh” dhe “shfrytëzim prostitucioni”.
Në kërkesën e dërguar nga Ministria italiane e Drejtësisë asaj shqiptare argumentohet se Ilir Bajri së bashku me të afërmin e tij, Enver Bajri, nga viti 2000 deri në 2002 kanë shfrytëzuar për prostitucion të paktën 11 gra dhe vajza. Këto vajza vinin kryesisht nga Shkodra, por edhe qytetet të tjera të Shqipërisë. Ato pajiseshin nga krerët e këtij grupi kriminal me pasaporta false dhe më pas detyroheshin të dilnin në rrugë dhe të prostituonin. Këtë detyrë e kryente Ilir Bajri, i cili u gjente hotelin dhe u tregonte zonën se ku do të dilnin për të prostituuar dhe paratë e fituara vinin në Shqipëri, përmes Fatmir Tafazi që kishte rolin e korrierit në këtë grup.
Dosja e bujshme e Bajrave nisi me operacionin ‘Oaz’ në shtator të vitit 2018 në Tiranë, Shkodër dhe në qytete të tjera të vendit duke çuar në pranga mbi 20 persona, por që tashmë të gjithë janë liruar nga akuzat e vrasjes, kanosjes, gjobëvënies, basteve të paligjshme dhe shumë të tjera.
