Ish-kryeministri Sali Berisha është “zhveshur” nga kostumi i politikani duke ardhur me një rrëfim ndryshe për jetën e tij. Teksa sot mbushi 78 vjeç, Berisha ka treguar dy sekretet sipas tij, të shëndetit të plotë.
I ftuar në Ora News, Berisha thotë se dy sekretet e tij janë puna dhe aktiviteti fizik.
Berisha: Unë bëhem 78 vjeç, por unë jam njeri që i besoj forcës së trajnimit apo kalitjes. Dy janë sekretet antiplakje. Puna është e para, asgjë nuk të mban më në formë korteksin cerebral, koren e trurit që është gjithë magazina e mendimit dhe dijeve, sa puna.
E dyta padiskutim aktiviteti fizik, unë e pëlqej shumë. Forma më kryesore mbetet ecja ndërsa nga veglat pëlqej eliptoidin që e përdor. Një pasion që kam e ushtroj në brigjet e Gjirit të Lalëzit por edhe në dhomën time. Unë eci, nuk njoh asnjë pengesë për të bërë 10 mijë hapa në ditë.
Berisha ka zbuluar se ka qenë konsumues i duhanit. Ai është shprehur se e ka lënë duhanin në vitin 1977 dhe nuk e ka konsumuar më.
Berisha: Cigaren nuk e pi, e kam lënë në vitin 1977 dhe se kam vënë kurrë më në gojë. Kam vullnet të hekurt. Cigarja është realisht një armik i njeriut, i faktuar nga mijëra studime. Ka edhe individë që në moshën 90-vjeçare që e pinë dhe nuk kanë parë ndonjë dëm, por ky është përjashtim. Rregulli është se cigarja është e dëmshme. Pasi kam menduar gjatë dhe kam arritur në përfundimin se ky është një armik unë jam ndarë, i kam thënë mirupafshim përgjithmonë. Albert Kamy thotë: Duhet të jesh mik i të gjitha kënaqësive normale por jo skllav i tyre. Njeriu nuk duhet të skllavërohet, kur sheh që ka dëmtime stop.
