TIRANË- “Shqipëria e 2030-s do t’i ketë ato që i pret qysh prej 1912-s dhe opozita nuk na ndalon”. Ky ka qenë premtimi i kryeministrit Rama në seancën e sotme plenare, teksa ka folur për akuzat e opozitës për Portin e Durrës. Në Kuvend po diskutohet marrëveshja për Portin, me kohë të palimituar, e miratuar si kërkesë e opozitës pas rreth 1 orë pati debate të ashpra për minutat që i ishin caktuar deputetëve të Rithemelimit.
Në nisje të debatit, kryeministri Edi Rama e cilësoi si historik projektin e portit të Durrësit duke thënë se pret me padurim që të votohet për investimin më të madh të huaj në vend. Nuk mungoi ironia ndaj opozitës për të cilët tha se ‘esatë’ janë ende mes nesh.
Debati për kohën
Ashtu sikurse pritej, seanca maratonë në Kuvendin e Shqipërisë për Portin e Durrësit nisi me tone të ashpra. Sali Berisha përsëriti skenarin e së enjtes së kaluar, duke bllokuar foltoren e Kuvendit për shkak se sipas tij, opozitës po tentohet t’i mbyllet goja për portin e Durrësit. Kjo solli ndërprerjen e seancës plenare, por jo të tentativës së Berishës për të shkaktuar zhurmë në Kuvend, i cili për të dytën herë e gjeti zgjidhjen përmes Facebook. Live nga kjo platformë sociale, akuzoi Taulant Ballën si porositës i vrasjeve në Elbasan. Edhe pas rikthimit të normalitetit, deputetët e Rithemelimit vijuan akuzat se nuk po lejohen të flasin mjaftueshëm. Kërkesës së tyre, iu bashkua edhe Enkelejd Alibeaj i cili e hodhi topin e përgjegjësisë tek socialistët. Kjo solli për të dytën herë ndërprerjen e seancës për të mbledhur Konferencën e Kryetarëve e cila vendosi që çdo deputetë të flasë 10 minuta për projekt-ligjin e marrëveshjes për Portin Turistik të Durrësit.
