Gazetarja Manjola Zeka ka publikuar në profilin e saj në Facebook një urim special dedikuar vajzës Edma, nga babai Edmond Arizaj në 18-vjetorin e saj. Zeka thekson se këtë urim kaq domethënës, familjarët ja kishin fshehur prej 3 vitesh, ndërsa ajo e kishte zbuluar së fundmi.
“Ma kishin mbajtur tre vjet fshehur 😂😂😂, po une e zbulova 😜😂Dhe po e publikoj se me duket shume urim i bukur per te mbetur vetem mes dy-tre njerezve 😜. Meqe ma kishin fshehur, s’po i marr asnjerit leje per ta publikuar 😜😂
p. s (Edma nuk e ka sot ditëlindjen, por mqs e bëra sot “zbulimin” po e publikoj)-Shkruan ajo.
“Edmës, në 18 vjetorin e saj
Ti sot hap krahët dhe do të përpiqesh të fitosh pavaresinë, lirinë dhe të drejtën e jetës tënde. Vetëm ligjërisht, kuptohe. Sepse sado të rritesh, të drejtosh e lyesh flokët, të vendosësh pudër e rimel, për mua do të mbetesh ai topth i bardhë mishi, me kacurrelat kafe, që mbytej së qeshuri teksa më hidhej në krahë. Nuk e di se si do të eci më tutje jeta jote, uroj më të jashtëzakonshmen sigurisht, por deri më sot po të them se ma ke mbushur çdo ditë me krenari, dashuri, madje dhe optimizëm, mua, një pesimisti kronik. Kurrë nuk abuzove me lirinë që të dhashë. Kurrë nuk e shpërdorove besimin që të dhashë. Faleminderit.
Më vjen mirë që ke krijuar një personalitet të fortë, megjithëse edhe më tremb ndonjëherë, sepse gjërat shumë të forta thyhen. Mos u tremb, nuk është ora e moralit, por dy gjëra do t’i them, ashtu si i mendoj unë, që kam mbetur ende tek këngët me tekst dhe muzikë.
Mos i fyej djemtë. Sado garipa, të pandjeshëm, idiotë ndonjëherë, qesharakë e fyella të duken, mos harro, edhe ata e kanë një zemër. Edhe ata kanë shpirt. Edhe ata kur janë vetëm e nuk u duhet të duken mbinjerëzorë, nisin e përjetojnë dramat e tyre. Prandaj mos u trego cinike, tallse, apo harbute. Mendo, a do të deshe të sillej kështu një vajzë me vëllanë tënd? Përpiqu pra të mos i fyesh. E në pergjithësi, mos fyej njeri.
E dyta dhe e fundit, sepse nuk e di a do arrish të lexosh deri këtu: Duaje vendin tënd, duaje shumë, por mos sakrifiko familjen. Familja vjen e para. Mos e harro këtë.
Tani, fluturo!
11 Tetor 2019- Përfundon Zeka
E kush nuk do ta donte një urim të tillë?
