Takimi i radhës në kuadër të dialogut Kosovë-Serbi, do të zhvillohet javën e ardhshme në Bruksel, në nivel të kryenegociatorëve.
Këtë e tha zëdhënësi i Bashkimit Evropian, Peter Stano, sipas të cilit, fokusi do të jetë në zbatimin e marrëveshjes për normalizim të marrëdhënieve, mbi bazë të dakordësisë së arritur në Ohër në 18 mars.
Kryenegociatori i Kosovës zëvendëskryeministri, Besnik Bislimi, dhe ai i Serbisë Petar Petkoviq pritet të diskutojnë mbi hapat e parë të zbatimit, ndërsa më vonë do të këtë takime të nivelit të lartë.
“Do të ketë takime tjera në nivel të lartë për të cilat do të njoftojmë kur të jetë e përshtatshme. Ajo që mund të them në këtë moment është se një takim i kryenegociatorëve do të zhvillohet javën që vjen në Bruksel. Kryenegociatorët nga të dyja palët janë ftuar nga lehtësuesi i dialogut që të vijnë në Bruksel dhe të avancojnë përpara me hapat e parë për implementimin e gjithë asaj që kanë rënë dakord”, tha Peter Stano.
Duke ju referuar propozimit të kryeministrit në detyrë të Malit të Zi, Dritan Abazovic, për të organizuar takimin e radhës së nivelit të lartë, Stano u shpreh i kënaqur që dialogu ka fituar popullaritet në rajon, por kujtoi se baza qendra e tij, në Bruksel.
“Na vjen mirë që dialogu po bëhet kaq i popullarizuar në rajon dhe gjithnjë e më shumë vende po ofrohen që të jenë mikpritës të tij. Por le të shkojmë hap pas hapi. Dialogu është i bazuar në Bruksel dhe kemi arritur një hap shumë të rëndësishëm në Ohër, pas pajtueshmërisë mes Presidentit të Serbisë dhe Kryeministrit të Kosovës, lidhur me Marrëveshjen, dhe për aneksin e implementimit. Tani fokusi është në implementim”, deklaroi më tej Stano.
Stano ka paralajmëruar se brenda BE-së po punohet që të rinisë puna në përshtatjen e kornizës negociuese me Serbinë, më saktësisht Kapitullin 35 dhe në mënyrë përkatëse edhe në rastin e Kosovës.
