Banorët e Bërxullës kanë kërkuar që qeveria të reagojë dhe t’i japë fund projektit abuziv Thumanë-Kashar. Në protestën e organizuar këtë të diel, ata kanë theksuar se nuk do të ndalen deri sa të fitojë e drejta.
Gjithashtu nuk kanë munguar as akuzat kundër pushtetarëve, duke thënë se kanë harruar popullin dhe vetë shkojnë nëpër restorante luksoze.
Një prej banorëve për mediat tha se qeveria duhet të marrë masa emergjente në lidhje me kërkesat e tyre dhe se protesta e tyre nuk do shuhet nëse drejtuesja e Kadastrës, Dallëndyshe Bici nuk i jep certifikatën e pronësimit.
“Projekti i rrugës është komplet abuziv. Këta e kanë pranuar projektin dhe sot u del problematike në terren. Toka nuk dëmshpërblehet se ka taksa të larta. Kanë marrë secili llokmat e veta të majmë dhe hanë pushtetarët. Sot 95% e këtyre banorëve janë më agjërim. Edhe besimtarë katolikë kanë festën sot, turp t’u vijë pushtetarë që i kanë lë në këtë gjendje. Jam kaq irrituar nuk di çfarë të them më. Harruan që erdhën në pushtet me votën e këtij populli. Pa ujë, pa rrugë, pa drita jemi. Nuk kanë bërë asgjë për popullin. Kryeministri, zonja ministre, edhe zonja Bici si e kanë kaq të vështirë të vijnë të flasin me popullin. Ku është shërbimi social? Unë jam një banor, por jam edhe kryeplak se më kanë zgjedhur banorët, por nuk kam çelësin magjik, ku do të shkojnë banorët kur t’u shembet shtëpia? Kanë nxjerrë një leje? Çfarë ka bërë shteti, ka 7 muaj?! Ku do të akomodohen banorët? Këto bëjnë fresk, vejnë kondicionerë, e kaloriferë bredhin në lokale luksoze dhe nuk duan ta dinë për popullin. Rrisin rrogat në fushatë. Jo mor zotëri, boll është lodhur ky popull me mashtrime”, tha ai.
