Kur kemi hyrë zyrtarisht në fushatën elektorale për zgjedhjet e 14 majit, Sali Berisha ka denoncuar kryeministrin Edi Rama, se u ka dhënë nga 1 mln euro secilës kompani të exit poll-eve për të manipuluar sondazhet.
Në një komunikim me gazetarët, Berisha u shpreh se të gjitha sondazhet i nxjerrin kandidatët e koalicionit “Bashkë Fitojmë” fitues të zgjedhjeve të 14 majit.
“Edi Rama u ka dhënë kompanive apo drejtorëve të poll-eve 1 mln euro secilës për të falsifikuar rezultatet e poll-eve.
Kjo është e vërteta, por sot për fat të mirë. E vërteta është që përsëri në këtë falsifikim, kandidatet tanë janë në ngjitje vertikale. Kur një i sapo futur në garë me një njeri që ka 8 vite që i lakohet emri ka një problem të njohjes, por gjindja e kandidatëve tanë është vertikale kudo.
E dyta, përveç poll-eve të cilat imagjinoni, pronarët e mediave i merrni me mend sa të çmendur janë ata
Ka një tjetër poll që askush nuk e manipulon dot. Kjo është analiza që u bëhet rrjeteve sociale. Facebook, instagramit dhe rrjeteve të tjera. Ato po gumëzhinë për Belind Këllicin, Bardh Spahinë, Luçiano Boçin, Igli Carën e për të gjithë kandidatët tanë”, tha Sali Berisha.
Berisha u bëri thirrje të gjithë shqiptarëve dhe demokratëve që t’i bashkohen hapjes së fushatës elektorale, ditën e nesërme në orën 12:00 në “Air Albania”.
“Pra këtë klimë të paparë ndonjëherë që nga viti 1992 i ftoj shqiptarët ta kurorëzojnë me një manifestim madhështor si prelud i fitores tonë të ardhshme, nesër në orën 12:00 në arenën e Tiranës, Air Albania, e cila duhet të ketë vetëm një emër, arena e lirisë. Aty nisi procesi si rithemelimit, nisi udhëtimi që kurorëzohet nesër me një hapja, manifestim popullor të shkëlqyer”, u shpreh ish-kryeministri.
