Kryeministri Edi Rama ka inspektuar polin sportiv të Durrësit, vendi ku do të ndërtohet edhe një nga akademitë me me famë të futbollit në botë. Siç njoftoi pak më herët kreu i qeverisë, bëhet fjalë për një klub të famshëm, emrin e të cilit tha se nuk do ta bëjë njëherë me dije deri në finalizimin e projektit.
“Po finalizojmë dy opsionet për Akademinë e Futbollit që do të sjellim në Durrës, akademinë e një klubi të madh me famë në botë, emrin e të cilit për momentin nuk e sjellim. Do të jetë një realitet i shpejtë. Durrësi do të ketë edhe një pol tjetër të rëndësishëm, një shkollë futbolli për fëmijët dhe një akademi për talentet që do të rriten këtu dhe do të integrohen sipas asaj që ofrojnë në rrjetin e futbollit ndërkombëtar.
Duam shumë që me platformën e re që kemi krijuar për fëmijët, të kemi sa më shumë rrugë të hapura për ata që janë të talentuar në sport prandaj duhet edhe kjo akademi.“, tha Rama. Paralelisht me Akademinë e Futbollit, do të jetë edhe një shkollë futbolli për fëmijët që do të jetë strukturë për të parë si zhvillohen në proces.
