Socialistët mblodhën këtë të mërkurë kryesinë për të bërë një bilanc të dy javëve të para të fushatës.
Edi Rama sqaroi deklaratat që ka bërë në disa bashki me orientim të djathtë, të cilëve iu pati thënë se nëse heqin nga puna kryebashkiakët socialistë e nëse fitojnë opozitarët, nuk do të marrin investime nga qeveria.
“Kam bërë thjesht një këshillë, më 14 maj njerëzit duhet absolutisht të qëndrojnë në krahun e duhur të historisë. Dhe krahu I duhur I historisë nuk është thjesht, në këtë moment PS, por është të qëndrosh në krah të aleancave strategjike të Shqipërisë.”
Një deklaratë që ngjalli reagime ishte edhe ajo në Patos, ku demokratëve Rama ju tha të mos shkojnë fare të votojnë, nëse nuk votojnë dot Partinë Socialiste.
“ Nuk është presion, është një mënyrë për t’ia thënë në mënyrë të drejtpërdrejtë njerëzve që do të jetë I pamundur bashkëpunimi jo sepse, nuk do duam ne që të mbështesim, por sepse këta nuk janë vënë aty për të zgjidhur hallet e komunitetit”
Kryesocialisti komentoi edhe posterin e kritikuar të Belind Këllicit, për të cilin tha se nuk e habiste.
“Një lloj ofendimi për votuesit përtej, deftesave të shkollës, përtej gishtave të mesit, këta janë vënë në dispozicion si parfum për zorrën qorre”
Socialistët planifikojnë që në fund të kësaj fushate, të kenë mbjellë 25 mijë pemë, në atë që e quajnë rrugëtimi i gjelbër drejt 14 majit.
