Ministrja e Arsimit dhe Sportit, Evis Kushi ishte e pranishme sot në finalen e konkursit ndërkombëtar të projektimit të stadiumit “Skënderbeu”.
Ajo tha se, ky nuk do të jetë vetëm një stadium, por do të jetë një qendër e re urbane ku do të ketë jetë gjatë 24 orëve dhe çdo ditë të javës.
“Unë besoj se asnjëherë më parë nuk është folur dhe punuar kaq shumë nga një qeveri për sportin.
Dhe këtë herë ne jemi për një ngjarje shumë të rëndësishme. Përveçse kemi ligjin e ri për sportin, përveçse se kemi një buxhet të shtuar të sportit, përveçse kemi investime të reja në infrastrukturë, ne çdo javë pothuajse kemi ngjarje të rëndësishme, evente të rëndësishme që lidhen me sportin.
Javën e kaluar ne ishin në Manchester ku nënshkruam një marrëveshje të rëndësishme për të sjellë akademinë elitare të futbollit dhe gjithashtu për të sjellë edhe klubin e futbollit për fëmijë në Durrës që do të shërbejë si një kampus jo vetëm për Shqipërinë por për të gjithë rajonin. Ndërkohë që një muaj më parë organizuam një konferencë të madhe për të analizuar arritjet dhe sfidat e sportit shqiptar.
Po kështu një muaj më parë së bashku me Ministrin Peleshi ne organizuam një ceremoni për dhënien e gradave honorifike për sportistët tanë elitarë, për kampionët tanë botërore dhe evropianë. E po të vazhdoja kështu me rezultatet e sportistëve ndoshta nuk do të ngalesha, por le të vijmë tek eventi i sotëm.
Në Korçë është gjithmonë kënaqësi të vish. Është Korça e Mësonjëtores së Parë Shqipe, është Korça e serenatave, por padyshim është edhe Korça e ekipit të Skënderbeut. Ekipit që na ka bërë krenarë ndër vite.
Korça prej vitesh është kthyer në një destinacion turistik të rëndësishëm pikërisht për shkak të këtyre vlerave dhe zhvillimeve dhe transformimeve të mëdha vitet e fundit. E vetmja gjë që i mungonte Korçës ishte pikërisht një stadium i standardeve më të mira bashkëkohore. Dhe lajmi i mirë është që ky nuk do të jetë vetëm një stadium, por do të jetë një qendër e re urbane ku do të ketë jetë gjatë 24 orëve dhe çdo ditë të javës.
Do të jetë një qendër që do të shërbejë si një katalizator për shumë zhvillime, për shumë dinamika në qytet duke integruar edhe jetën sportive kulturore, artistike, edukative, por edhe tregtare.
Dhe më vjen mirë të them kjo qendër do t’i japë jo vetëm një zhvillim të madh ekonomisë dhe turizmit të Korçës dhe të gjithë rajonit, por do të nxisë edhe më shumë ekipin e Skënderbeut për të patur rezultate si ato të vitit 2011 deri në 2016-ën ku për 6 vjet ka qenë kampion dhe është i vetmi dhe i pari ekip shqiptar që ka marrë pjesë në ndeshjet e grupeve në një kampionat evropian.
Sot zhvillojmë konkursin. I falënderoj të gjitha studiot, të gjitha skuadrat që kanë marrë pjesë dhe të shpresojmë që të kemi rezultate sa më të mira”, u shpreh ministrja Kushi.
