Kryeministri i Kosovës, Albi Kurti ka kujtuar Masakrën në Studime të Vushtrrisë, ku në ‘Facebook’ shkruan se gjaku i derdhur për liri nuk shlyhet kurrë ashtu si dhe krimet e Serbisë.
Teksa ndodhet në Bruksel ku do të takohet me me presidentin e Serbisë Aleksandër Vuçiç, Kurti ka bërë thirrje që drejtësia të zbulojë të vërtetën dhe kriminelët të vuajnë dënimin, pasi krimet e luftës nuk vjetërsohen.
“Vuajtjet e popullit tonë janë të njoma përherë”, thekson ai.
Postimi i plotë:
Nё ditёt e para tё muajit maj 1999, forcat serbe dogjën fshatrat e Vushtrrisё dhe dëbuan me dhunë banorët . I urdhëruan tё largohen drejt Shqipërisë. Më 2 maj të vitit 1999, në fshatin Studime të Vushtrrisë, forcat serbe nxorën nga kolona dhe i pushkatuan 116 civilë shqiptarë. Ekzekutuan fëmijë para syve të prindërve, vranë të rinj e pleq, e edhe gra shtatzëna. Familjes Gërxhaliu ia vranë 36 anëtarë, nga mosha 85 vjeç deri në 5 vjeç.
Në këtë 24 vjetor përkujtojmë martirët e Masakrës së Studimes së Vushtrrisë. E kaluara jonë është vendimtare për të tashmen dhe të ardhmen tonë. Gjaku i derdhur për liri nuk shlyhet kurrë, siç nuk mund të shlyhen krimet e Serbisë në Kosovë.
I bëj thirrje sistemit tonë të drejtësisë që të veprojë për ndriçimin e së vërtetës. Dënime për kriminelët e luftës dhe drejtësi për viktimat. Krimet e luftës nuk parashkruhen as vjetërsohen. Vuajtjet e popullit tonë janë të njoma përherë.
I përjetshëm qoftë kujtimi për të gjithë martirët dhe dëshmorët e lirisë!
