Ministrja e Arsimit dhe Sportit, Evis Kushi u shpreh sot se stadiumi i ri i Vlorës do të jetë një qendër e re për qytetin.
Kushi u shpreh se i detyrohemi ‘Flamurtarit’, që ky shkëlqim të rikthehet, që tradita të vazhdojë dhe të përcillet brez pas brezi, por po ashtu i detyrohemi edhe Vlorës.
“Ishim pikërisht këtu, në këtë sallë një muaj më parë kur festuam 100 vjetorin e klubit shumësportësh Flamurtari.
100 vite plot me suksese, plot me arritje, por edhe me sfida, vështirësi, sigurisht nuk ka qenë e lehtë, ka patur ngritje por edhe ulje, por ajo që ka qenë gjithmonë e pandryshuar, ka qenë pasioni për sportin, për Flamurtarin, për Vlorën dhe veçanërisht për futbollin.
Flamurtari edhe në arenën ndërkombëtare ka patur arritje të spikatura. Do të veçoja sezonin e vitit 1987-1988 kur Flamutrari u seleksionua në çerekfinalen e UEFA-s, madje arriti të fitonte edhe me Barcelonën. Kanë qenë golat e Kushtës, Vasil Rucit, por edhe shumë sportistë të tjerë që e kanë bërë krenar jo vetëm Vlorën, por të gjithë kombin shqiptar.
E pra, ne i detyrohemi Flamurtarit, i detyrohemi që ky shkëlqim të rikthehet, që tradita të vazhdojë dhe të përcillet brez pas brezi, por po ashtu ne i detyrohemi edhe Vlorës.
Vlora tashmë është një qytet evropian. Është një destinacion turistik i preferuar nga turistë nga shumë vende jo vetëm të Evropës, por edhe të botës. Është një destinacion për bukuritë natyrore për vlerat qe ka, por natyrisht edhe për investimet madhore në çdo fushë.
Lungomare e mrekullueshme, qyteti historik, qendra historike, e patjetër nuk mungoje edhe një stadium i standardeve bashkëkohore. Prandaj ne sot jemi këtu, për këtë konkurs ndërkombëtar, për të zgjedhur jo thjesht projektin e një stadiumi, por një qendre të re për Vlorën. Një qendër që do të ketë jetë 24 orë të ditës të 7 ditë të javës. Një qendër ku do të ndërthuren jeta sportive, por edhe artistike, kulturore, edukative dhe tregtare padyshim.
Unë besoj se pozicioni strategjik, vendndodhja e stadiumit është kaq e përshtatshme për të bërë më të mirën, dhe besoj se në këtë 100 vjetor nuk mund të ketë dhuratë më të mirë për Vlorës sa një projekt i tillë.
Unë i falënderoj me zemër të gjitha studiot që morën pjesë në këtë konkurs. Sot do të shohim tre projektet finaliste dhe mes tyre do të zgjedhim projektin që do të zbatohet”, tha ministrja Kushi.
