Ministrja e Turizmit dhe Mjedisit Mirela Kumbaro gjatë një vizite në Dropull, së bashku me disa mësues i ka dedikuar një videomesazh të veçantë Ministres së Arsimit dhe Sportit Evis Kushi për shkollën e Bularatit e cila po rikonstruktohet.
Në videomesazh znj. Kumbaro i shpreh falënderimin ministres së arsimit edhe në emër të mësuesve të shkollës së Bularatit për mbështetjen që znj. Kushi ka dhënë për shkollën e re.
“Falë bashkëpunimit tënd arritëm ta ndërtojmë, ta rikonstruktojmë dhe po del fantastike. Të gjitha vajzat e Dropullit të thonë me shumë kënaqësi ‘efharisto para poli’. Të përshëndesim.” – shprehet znj. Kumbaro.
Nuk ka vonuar edhe përshëndetja e znj. Kushi ndaj Ministres Kumbaro dhe mësuesve dropullitë për këtë mesazh falënderimi.
“E dashur Mirela, të dashur mësuese dhe mësues të shkollës së Bularatit në Dropull, kënaqësi dhe surprizë për mua ky videomesazh. Ju falënderoj me zemër. Vitin e kaluar për mua ishte kënaqësi shumë e madhe që arritëm falë këmbënguljes së Mirelës, kryetarit të bashkisë, mbi të gjitha edhe kryeministrit, arritëm të financojmë rikonstruksionin e shkollës suaj. Do të bëjmë sëbashku edhe shumë punë të mira.
Unë ju falënderoj të gjithëve për përkushtimin dhe ju uroj shumë suksese për mbylljen e këtij viti shkollor. Përqafime” – shprehet znj. Kushi.
