Komisioni Qendror i Zgjedhjeve (KQZ) i ka dhënë mandatin e kryebashkiakut të Himarës, Fredi Belerit, teksa ky i fundit gjendet në burg, pasi akuzohet për shit-blerje votash.
Beleri fitoi me një diferencë të ngushtë votash kundrejt rivalit të tij nga Partia Socialiste, Jorgo Goro.
Megjithatë, Beleri ende nuk mund ta ushtrojë detyrën e kryebashkiakut, pasi ndodhet në qeli.
Të hënën, GJKKO dha vendimin “Arrest me burg” për kryebashkiakun e zgjedhur të Himarës, Fredi Beleri dhe bashkëpunëtorin e tij, Pandeli Kokaveshi.
Arrestimi i tij është bërë dy ditë para zgjedhjeve të 14 majit. Kjo ngjarje solli reagime edhe nga pala greke, e cila ka bërë shpesh thirrje për lirimin e Belerit.
