Kryetarja e Kuvendit, znj. Lindita Nikolla, priti sot Presidentin e Estonisë, z. Alar Karis, dhe delegacionin që e shoqëron, i cili po zhvillon një vizitë zyrtare në Shqipëri. Në takim ishte e pranishme edhe Ambasadorja znj. Shpresa Kureta.
Kryetarja Nikolla vlerësoi marrëdhëniet shumë të mira mes dy vendeve dhe vuri në dukje se Shqipëria dëshiron të forcojë dialogun politik me Estoninë, si një nxitës i marrëdhënieve dypalëshe. Shqipëria i është mirënjohëse Estonisë për mbështetjen e integrimit në BE dhe çeljen e negociatave, solidaritetin dhe bashkëpunimin në NATO, qëndrimin konstruktiv për integrimin europian të Ballkanit Perëndimor si edhe vullnetin për zgjerimin e bashkëpunimit dypalësh. Znj. Nikolla vuri në dukje se bashkëpunimi dypalësh mund të zgjerohet në fushat e teknologjisë së informacionit, qeverisjes elektronike, inovacionit, turizmit, kulturës, transportit, infrastrukturës, bujqësisë, industrisë farmaceutike etj.
Gjithashtu, Kryetarja Nikolla bëri një ekspoze të kontributit të Kuvendit për avancimin e reformës në drejtësi, reformës elektorale, luftës kundër korrupsionit dhe krimit të organizuar dhe konsolidimit të institucioneve demokratike.
Kryetarja Nikolla vuri në dukje mbështetjen e palëkundur të Shqipërisë, si një anëtare jo e përhershme e Këshillit të Sigurimit, për luftën e drejtë të Ukrainës për mbrojtjen e integritetit territorial, sovranitetit dhe pavarësisë së saj, në një linjë me qëndrimet e BE-së, NATO-s dhe SHBA.
Presidenti i Estonisë, z. Alar Karis, falenderoi Kryetaren Nikolla për pritjen dhe nënvizoi se Estonia do të vijojë të mbështesë Shqipërinë në rrugën e saj drejt Bashkimit Europian, duke shkëmbyer edhe eksperiencën e Estonisë. Presidenti Karis vuri në dukje mundësitë e bashkëpunimit mes parlamenteve, universiteteve dhe biznesit, sidomos në nxitjen e luftës kundër korrupsionit, konsolidimit të demokracisë, zhvillimit të teknologjive të informacionit, inovacionit dhe qeverisjes elektronike.
Në lidhje me mbështetjen e Ukrainës, Presidenti Karis vuri në dukje edhe nevojën që komuniteti ndërkombëtar duhet të kontribuojë për rindërtimin dhe zhvillimin e Ukrainës.
