“Nuk do ta humbisja për asgjë në botë këtë ndeshje. Do të jem një më shumë në detin e tifozëve të kaltër dhe mezi pres”.
Me këto fjalë e ka nisur deklaratën e tij për përballjen mes Mançester Sitit dhe Interit, Serxho Aguero, golashënuesi më i mirë i historisë së “qytetarëve”, që është ndalur më pas te argjentinasi dhe parashikim për finalen.
Çfarë sezoni ka bërë skuadra e Guardiolës?
Një sezon të mrekullueshëm dhe u mungon vetëm guri i fundit. Kur shoh skuadrën, shoh një plan të konsoliduar loje dhe paraqitje shumë solide në të gjitha nivelet. Jemi në futboll dhe çdo gjë mund të ndodhë, por mendoj se ka ardhur koha të merret rezultati që të gjithë duam.
Dy argjentinas në fushë si Lautaro dhe Alvarez…
Është një krenari e madhe të kesh dy lojtarë argjentinas në një finale të Champions League. Huliani ka bërë një sezon të shkëlqyer në vitin e tij të parë, duke shënuar dhe duke u përshtatur në mënyrë ideale me skuadrën. Lautaro, nga ana tjetër, është element thelbësor për Interin dhe e ka treguar sa i rëndësishëm është edhe për kombëtaren, por nuk mund të jem neutral në këtë pikë: do të jem tifoz i Alvarezit.
Në fushë do të jetë edhe ish-shoku juaj Xheko…
Më bën shumë të lumtur që arriti në finale, ai e meriton. Është një lojtar i mrekullueshëm dhe një njeri i madh gjithashtu. Nuk mund të mos mendoj për golin që shënoi kundër QPR në 2012, i cili bëri të mundur fitoren në atë ndeshje. Nuk jam i befasuar për atë që po bën, mund të jetë i rrezikshëm në çdo moment.
Çfarë ndeshje do të jetë?
Do të jetë e vështirë, e di. Arritja në finale nuk është e lehtë dhe Interi do të thotë që e ka merituar. Ata kanë një mbrojtje të fortë, luftojnë me mish e me shpirt në mesfushë dhe kanë një sulm të gjithanshëm. Duke lënë mënjanë nisjen favoritë, sepse nuk ka të tillë në këtë fazë, mund të them që Siti ka shumë besim. Gjithë skuadra e di çfarë duhet të bëjë në fushë kjo më bën të shpresoj shumë. Është luftuar për një kohë të gjatë për të mbërritur në këtë moment dhe kam besim absolut.
