Tashmë është zyrtare, Zoran Zekiç është trajneri i ri i Partizanit. Lajmin e bëri të ditur vetë klubi i kuq nëpërmjet një njoftimi zyrtar në rrjetet sociale, ku njëkohësisht prezanton edhe drejtorin e ri sportiv.
“Partizani zyrtarizon arritjen e marrëveshjes me trajnerin Zoran Zekiç. 49-vjeçari nga Kroacia, i cili do të drejtojë kampionët e Shqipërisë në sezonin e ri 2023-2024, është prezantuar sot nga presidenti Gazment Demi dhe drejtori sportiv, Arbër Abilaliaj. Në sezonin e fundit Zekiç ishte pjesë e ekipit Slaven Belupos, ndërsa përgjatë karrierës si trajner ai regjistron edhe eksperienca në drejtimin e Sherif Tiraspol, Osijek, Diosgior dhe Maksimir. Zekiç vjen në drejtimin e 17-të herë kampionëve të Shqipërisë për të nisur një projekt ambicioz dhe fitues. Sot (dje) skuadra nis zyrtarisht përgatitjet për sezonin e ri futbollistik”, shkruhet në komunikatë.
Ndërkohë, “Panorama Sport” mëson se strategu kroat ka firmosur një kontratë, që e lidh me Partizanin deri në fund të sezonit të ri, me opsion rinovimin edhe për një tjetër edicion, në varësi të ecurisë. Zekiç vjen te Partizani së bashku me Mario Kuic si zëvendëstrajner dhe Marko Matijeviç si përgatitës atletik. Pjesë e stafit janë edhe ndihmësit Fatjon Tafaj dhe Klajdi Kënga, që pritet të vazhdojnë si pjesë e stafit.
STËRVITJA E PARË – Ora 18:30, pas një shiu të rrëmbyer, Zoran Zekiç del në fushë para të gjithëve. Pas tij paraqiten edhe ndihmësit, para se skuadra të zbarkojë në terrenin e blertë. Ndërkohë, në këtë seancë të parë ishin vetëm një pjesë e ekipit, teksa në vijim pritet të bashkohen edhe pjesa tjetër. Afrikanët mungonin të gjithë, ndërkohë që as emra si Sota, Hoxha, Da Silva apo Menish nuk ishin të pranishëm. Nga tribuna, një pjesë e trajnerëve të moshave, por edhe simpatizantë të klubit ndjekin me shumë kureshtje stërvitjen e parë të Zoran Zekiçit. Kjo seancë qe përqendruar më së shumti në aspektin fizik, me lojtarët, që kanë kaluar një kohë të konsiderueshme jashtë fushave.
Gjithçka nis me një vrapim rreth fushës dhe vazhdon me një “ndeshje” hendbolli, për të nxehur të gjithë muskujt e mundshëm. Zoran Zekiç, në pjesën më të madhe të kohës komunikon anglisht, ndërkohë që rolin e përkthyesit e kryen Fatjon Tafaj. Nuk mungon edhe ndonjë fjalë kroatisht, megjithëse shumë pak veta në fushë e kuptojnë se çfarë po thotë. Drejtori i ri sportiv, Arbër Abilaliaj, e ndjek stërvitjen nga pranë fushës dhe më pas ngjitet në pjesën e tribunës kryesore. Trajneri organizon edhe situata të ndryshme të lojës, teksa që në seancën e parë përqendrohet te sulmi.
TRAJNER IMPULSIV – Ashtu siç e kishim lajmëruar, Zekiç është një trajner mjaft impulsiv dhe mundohet t’i transmetojë skuadrës sa më shumë grintë. Si një ballkanas tipik, toni i lartë i zërit është një karakteristikë lehtësisht e dallueshme. Megjithëse stërvitja e parë, 49-vjeçari tregohet mjaft “i sertë” ndaj lojtarëve në momentet kur nuk bëjnë atë që ai kërkon. Madje herë pas here nuk heziton as të flasë me tone të larta dhe të ndalojë lojën shpesh, për të treguar veprimet dhe mënyrën sesi duhet të përgjigjet skuadra në fushë. Ai kërkon që lojtarët të jenë vazhdimisht aktivë dhe të veprojnë me shpejtësi edhe në aktivitete të thjeshta, siç është lëvizja e portës së madhe në mesin e fushës. Në fund Zekiç urdhëron lojtarët të heqin atletet dhe të bëjnë një vrapim rreth fushës vetëm me çorape. Kjo pritet me pak çudi nga lojtarët, që e mbyllin seancën pak si “të çoroditur”.
