Ambasadorja e Shteteve të Bashkuara në Tiranë, Yuri Kim largohet nga Shqipëria teksa komuniteti i selisë amerikane është mbledhur për t’i dhënë lamtumirën.
Përmes një ceremonie të veçantë, stafi e ka përshëndetur ambasadoren Kim si dhe i ka dhuruar një flamur të veçantë shqiptar dhe një album fotografik.
Gjithashtu, Garda e Marinës Amerikane i ka dhuruar Kim flamurin e SHBA që valëvitej në selinë e ambasadës.
Mesazhi i plotë:
Lamtumirë Ambasadore Kim!
Komuniteti i ambasadës u mblodh këtë javë për t’i thënë lamtumirë Ambasadores Yuri Kim teksa ajo niset nga Shqipëria për detyrën e saj të radhës në Uashington DC. Stafi amerikan dhe shqiptar ndanë vlerësimet për ambasadoren për përpjekjet e saj për të çuar përpara marrëdhëniet dypalëshe mes Shteteve të Bashkuara dhe Shqipërisë, udhëheqjen e saj dhe për dhembshurinë dhe kujdesin e saj për punonjësit e Ambasadës së SHBA në Tiranë.
Stafi i dhuroi ambasadores një flamur të veçantë shqiptar dhe një album fotografik nga këto tre vjet e gjysmë të saj në Shqipëri. Detashmenti i Gardës së Marinës të Shteteve të Bashkuara i dhuroi ambasadores flamurin amerikan që valonte nga shtiza e flamurit të ambasadës.
