Pas një ndeshjeje me mjaft intensitet ndaj BATE Borisovit, ku ekipi arriti të marrë një barazim me lojë të kënaqshme, Partizani tashmë lë gjithçka pas krahëve dhe nis menjëherë punën për përballjen e dytë, që do të luhet në Hungari të martën e ardhshme në Mezokovesd, duke nisur nga ora 20:00.
Që nga e hëna skuadra ndodhet në grumbullim dhe kjo do të vazhdojë deri në ndeshjen ndaj bjelloruseve. Partizani është vendosur në një nga hotelet pranë stadiumit “Air Albania”, teksa stërvitjet do të vijojë t’i bëjë në impiantin e vet, “Arena e Demave”.
Fatmirësisht nuk ka asnjë dëmtim dhe nga dita e sotme do të nisë misioni për ndeshjen e dytë ndaj BATE-s, që vendos edhe fatin në Champions.
