Dy deputetët e Partisë Socialiste, Pandeli Majko dhe Fatmir Xhafaj, e kanë abstenuar votën e tyre për draftin e paraqitur nga Qeveria lidhur me projektligjin e ri për legalizimin e prodhimit të kanabisit për qëllime mjekësore.
Pavarësisht kësaj, drafti ka kaluar në Komisionin e Ligjeve me votat e të majtëve, pas votimit të zhvilluar.
Nga ana tjetër, deputetët e opozitës nuk kanë qenë të pranishëm në mbledhje dhe disa prej tyre madje kanë deklaruar se nuk kanë qenë të njoftuar nga administrata e Kuvendit për një zhvillim të tillë.
Ndër ta, edhe deputeti demokrat, Sajmir Koreshi, i cili ka thënë se e gjitha është zhvilluar jashtë rendit të ditës dhe se ka pasur për qëllim kalimin sa më të shpejtë të ligjit, kur ndërkohë çështja “më e nxehtë” në Parlament është ajo e aprovimit të arrestimit të ish-zëvendëskryeministrit, Arben Ahmetaj.
