Ervis Martinaj, mbreti i kumarit i zhdukur pa gjurmë prej gushtit të vitit të kaluar, ishte i interesuar për vrasjen e Gjin Boriçit. Ai ia ngarkoi këtë detyrë Behar Bajrit, një prej pjesëtarëve të grupit kriminal me bazë në Dobraç të Shkodrës. Vrasja e Boriçit u krye të gusht të 2020 në Vaun e Dejës.
Martinaj, fati i të cilit mbetet mister, nuk dha asnjë qindarkë për shërbimin që mori, por në këmbim mori përsipër të vriste Kleanth Musabelliun, për llogari të biznesmenit Pëllumb Gjoka, që kishte një konflikt të hapur me të, pasi më herët gjatë një debati ish-oficeri i Shërbimit të Kontrollit në Burgje e kishte plagosur atë.
Kështu rezulton gjatë hetimit të SPAK, që u finalizua dy ditë më parë me arrestimin e 6 të dyshuarve, mes tyre biznesmeni Pëllumb Gjoka, ish-drejtuesi i forcës së Posaçme Operacionale Oltion Bistri, ish-drejtuesi i Prokurorisë së Kukësit, Xhevahir Lita, dhe shpalljen në kërkim të 9 të tjerëve.
Hetimet nisën 7 muaj më parë, pasi autoritetet franceze i sollën SPAK fashikuj të tërë ku ishin zbardhur bisedat mes të dyshuarve në aplikacionet SKY dhe “ENCroChat’ ku ata flisnin hapur për vrasje, plane për të kryer atentate, korrupsion e krime të tjera. Në këtë hetim SPAK bashkëpunoi dhe me hetues belgë e holandezë.
Konkretisht, Ervis Martinaj, Pëllumb Gjoka e Behar Bajri flisnin për vrasjen e Boriçit dhe planin për të ekzekutuar Musabelliun. Një moment, Behar Bajri e informon Gjokën se kishte gjetur vrasës të huaj, por kërkonin 100 mijë, duke nënkuptuar 100 mijë euro.
“Jepi edhe 120 po të jetë nevoja, vetëm të kryhet”, i përgjigjet biznesmeni.
Në komunikimet mes të dyshuarve janë zbuluar se ata kanë folur me detaje për planet e atentateve, madje kanë dërguar dhe pamjet e vrasjeve, ndërsa rezulton se në rastin e Gjin Boriçit pasi e ekzekutuan, ata i shkruan edhe në varrim.
Në listë për të vrarë nga anëtarët e grupit kriminal sipas SPAK kishin renditur dhe emrat e Ibrahim Licit, mikut të tij, Dorian Duli dhe Genc Tafilit. Këtu del në skenë edhe Ardit Hasanbega, ish-zyrtar i policisë në Shkodër, që dyshohet se siguroi kushte për vrasjen e Ibrahim Licit, vrasje që nuk u krye.
Po ashtu zbulohet edhe përfshirja e Prekë Kodrës, një personazh problematik në botën e krimit. Grupi sipas SPAK po krijonte kushtet për të ekzekutuar edhe Taulant Pepajn. Në këtë episod përshihet direkt Elion Hato, miku i Ervis Martinajt.
Ndërsa, prokurori Xhevahir Lita ka komunikime me anëtarë të grupit me qëllim që ata të mbyllnin hesapet me drejtësinë. Ndërsa Oltion Bistri akuzohet për shpërdorim detyre dhe nxjerrje e sekreteve, pasi ka favorizuar Pëllumb Gjokën në biznesin e lojërave të fatit dhe e informonte atë për aksionet policore.
SPAK thekson se gjatë kontrollit të 26 banesave dhe ambienteve të ndryshme janë gjetur e sekuestruar armë të ndryshme zjarri, maska, pajisje elektronike monitorimi, servea dhe kamera, përmes të cilave monitoroheshin ambiente të jashtme në zona të ndryshme të qytetit të Shkodrës, shuma të konsiderueshme parash dhe automjete.
