Një postim emocionues është bërë nga Lady Gaga për Tony Bennett, që u nda nga jeta dhjetë ditë më parë në moshën 96-vjeçare, pas betejës së tij me Alzheimer.
Performuesi i njohur kishte një miqësi të ngushtë me këngëtaren, ndërsa kishin ndarë edhe skenën.
Me një postim në llogarinë personale në Instagram, ajo ka shkruar për gjithçka që ai i ka mësuar ndër vite dhe ka theksuar se sa shumë e ka dashur.
Në veçanti, ajo ka publikuar një foto, në të cilën janë përqafuar dhe poshtë saj ka shkruar një tekst të gjatë.
“Do të më mungojë përgjithmonë shoku im. Do të më mungojë të këndoj me të, të regjistroj me të, të flas me të, të jem në skenë me të. Unë dhe Toni e kishim këtë fuqi magjike. U transportuam në një epokë tjetër, së bashku e modernizuam muzikën dhe i dhamë jetë të re si dyshe performuese. Por nuk ishte thjesht një akt. Marrëdhënia jonë ishte shumë reale. Ai gjithashtu më tregoi se si ta mbaja shpirtin tim të ngritur dhe kokën lart. “Vazhdo,” tha ai. Ishte optimist, besonte në punë cilësore. Plus, ishte mirënjohja… Toni ishte gjithmonë mirënjohës. Ai shërbeu në Luftën e Dytë Botërore, marshoi me Martin Luther King Jr dhe këndoi xhaz me këngëtarët më të mëdhenj të botës”.
Më pas ajo ka shprehur ndjenjat e saj për të, ndërsa ka shpjeguar se diferenca e tyre në moshë nuk ka luajtur asnjëherë rol në lidhjen e tyre, pasi ata ishin miq të vërtetë.
“Diferenca jonë në moshë nuk kishte rëndësi – në fakt, ai i dha secilit prej nesh diçka që asnjëri prej nesh nuk e kishte me shumicën e njerëzve. Humbja e Tonit nga Alzheimer ishte e dhimbshme, por gjithashtu ishte shumë e bukur. Një sezon i humbjes së kujtesës është një kohë kaq e shenjtë në jetën e një personi. Ekziston një ndjenjë e tillë cenueshmërie dhe një dëshirë për të ruajtur dinjitetin. Gjithçka që doja ishte që Toni të kujtonte se sa shumë e doja dhe sa mirënjohëse isha që e kisha në jetën time. Por, ndërsa kjo u zbeh ngadalë, e kuptova thellë se ai po ndante me mua momentin më të pambrojtur në jetën e tij- ai ishte i gatshëm të këndonte me mua kur natyra e tij po ndryshonte kaq thellë. Nuk do ta harroj kurrë këtë përvojë. Nuk do ta harroj kurrë Tony Bennett” ka vazhduar Gaga duke mbyllur postimin e saj.
