Reali i Madridit pësoi një humbje të madhe me Tibu Kurtuan, i cili do të qëndrojë jashtë fushave pothuajse gjithë sezonin pasi ka këputur ligamentet. Kështu “galaktikët” janë hedhur menjëherë në aksion për të gjetur zëvendësuesin e belgut.
Në skenë janë shfaqur pesë gardianë të cilët janë në kërkim të një skuadre të re këtë verë, teksa Reali mund të përfitojë nga kjo situatë.
DAVID DE GEA
I pari është fiksimi i vjetër i Ançelotit, David De Gea. Përpara 8 vitesdh, “galaktikët” ishin shumë pranë transferimit të spanjollit, teksa çdo gjë dështoi në orët e fundit të merkatos. Tashmë spanjolli është portier i lirë dhe kjo mund të jetë një mundësi e mirë që Ançeloti ta bindë për të veshur fanellën e Realit.
SAMIR HANDANOVIÇ
Ashtu si De Gea, edhe Handanoviç është një portier i lirë pas përfundimit të kontratës me Interin. Eksperienca e sllovenit mund t’i shërbejë Ançelotit për të pasur siguri në portë gjatë sezonit.
KEPA ARRIZABALAGA
Kepa duket se nuk është pjesë e planeve të Mauricio Poçetinos te Çelsi, me “Blutë” që transferuan Robert Sançez. Kështu një kalim te Reali do të ishte ajo që mund t’i duhej spanjollit për të treguar aftësitë e tij.
HUGO LORIS
Një tjetër portier që kërkon një aventurë të re këtë verë është edhe ish-kapiteni i Francës, Hugo Loris. Ai i ka kërkuar drejtuesve të Totenhemit se do të largohet këtë verë dhe këta të fundit janë të gatshëm që ta lënë të lirë. Kjo gjë mund ta bindë Realin që të tentojë të afrojë gardianin që u shpall kampion Bote me “Gjelat” në 2018.
JASIN BONO
Gardiani që shkëlqeu në Katar me Marokun është gjithashtu një opsion i mundshëm për Realin. Edhe ai është në kërkim të një aventure të re, kështu që Madridi mbetet një opsion.
