Sali Berisha me deputetët e Rithemelimit po shkojnë drejt një grupi të ri parlamentar, por siç pohoi, kjo lëvizje nuk është lëshim terreni për Lulzim Bashën i cili më 29 Korrik u kthye në krye të Partisë Demokratike Zyrtare.
“Lulzim Bashën e njohim si një peng të shpifur të Edi Ramës, dhe asgjë më shumë. Të tillë e njohin të gjithë demokratët shqiptarë, të tillë e njeh opinioni publik shqiptar. Lulzim Basha është një mjeran që keqpërdoret sipas rastit nga Rama-Balla, Balla-Rama dhe që ndonjëherë ia japin me qira edhe Erion Veliajt”, tha Berisha.
E ndërkohë që një garë e afërt politike është në prag. Zgjedhjet e pjesshme të Kukësit më 24 Shtator pritet të vendosin përballë kandidatët e Ramës, Berishës dhe të Bashës. Burime nga selia e këtij të fundit pohuan se do të kenë kandidatin e tyre.
Ndërsa nga kampi i Rithemelimit vazhdojnë të jenë të pavendosur pas përfaqësimit që po atën me 14 Maj me doktorin, Admir Sinamati, emri dhe reputacioni i të cilit nuk mjaftuan ta nxirrnin fitues përballë Safet Gjicit.
“Në bashkëpunim me aleatët po diskutohet dhe do vendoset. Sapo të vendoset unë do t’ju njoftoj. Do keni Primare sërish për Kukësin? Do vendoset”, deklaroi Berisha.
E sigurt është se në kushtet kur demokratët e Berishës deklarohen shumicë, por pa logo e vulë zyrtare të Partisë Demokratike, përsëri në ndihmë vjen Ilir Meta, nën koalicionin me emrin e të cilit do të regjistrohet kandidati i Berishës për Kukësin.
Nga ana tjetër as socialistët, si fituesit e 14 Majit nuk kanë deklaruar një kandidaturë zyrtare. Në PS qarkullojnë disa emra me të cilët do të synohet harresa e imazhit që la Safet Gjici, kryebashkiaku që u arrestua për korrupsion pasiv, pas publikimit të një videoje intime në zyrën e tij.
