Ministri i Brendshëm, Taulant Balla, ka reaguar pas ngjarjes së rëndë të dhunës së ushtruar ndaj një 33-vjeçareje në Mat, e cila ka përfunduar në spitalin psikiatrik në Tiranë.
Balla është shprehur se duhen ndëshkime të ashpra për çrrënjosjen e dhunës në familje, ku gratë bien viktimë e barbarisë së burrave.
Ministri thekson se “denoncimi për ndihmë tek Policia e Shtetit është hapi i duhur jetik, për çlirimin nga makthi përpara se sa të jetë shumë vonë dhe për fitoren mbi padrejtësinë ekstreme të dhunës”.
“Rasti i dhunës barbare ndaj një gruaje në Mat, i zbuluar nga Policia e Shtetit pas një pune hetimore që meriton përgëzime, kërkon që edhe Prokuroria dhe Gjykata të ngrihen në nivelin e pritshmërisë shoqërore të një vendi europian. Na duhen ndërshkime të ashpra për goditjen e fortë deri në çrrënjosje të dhunës në familje, ku gratë bien viktimë e barbarisë së burrave.
Dua ta garantoj çdo grua, çdo vajzë se telefonata apo denoncimi i saj për ndihmë tek Policia e Shtetit është hapi i duhur jetik, për çlirimin nga makthi përpara se sa të jetë shumë vonë dhe për fitoren mbi padrejtësinë ekstreme të dhunës”, shprehet ministri Balla.
