Kur jemi vetëm një ditë larg mbajtjes së Ministerialit të Ekonomisë, ka mbërritur delegacioni francez i cili përfaqësohet nga Ministri i i deleguar për Tregtinë e Jashtme, Olivier Becht, si dhe një grup përfaqësuesish të biznesit francez.
Në takimin zyrtar dy ministrat vlerësuan marrëdhëniet e mira ekonomike e tregtare mes dy vendeve si dhe treguan se sa i takon të ardhmes ka ende hapësira për forcimin e tyre.
Mete falenderoi ministrin francez për mbështetjen që Franca siguro për vendin tonë, në kuadër të reformave të ndërmarra nga Qeveria, zhvillimit ekonomik dhe procesit të integrimit në Bashkimin Europian, ndërsa evidentoi mbështetjen financiare që qeveria franceze duke mbështetur reformën në sektorin e energjisë, reformën e ujit, projektin e barazisë gjinore, etj.
Ministri i Financave dhe Ekonomisë bëri një prezantim të shkurtër të situatës ekonomike në vend dhe mundësitë që ai ofron për investitorët e huaj, si edhe shprehu interesin e palës shqiptare që biznesi francez të zgjerojë prezencën e tij në vendin tonë, duke investuar në sektorë të ndryshëm të ekonomisë, si energjia, transporti, turizmi, etj.
Nga ana e tij, ministri Becht falenderoi Meten për mikpritjen dhe shprehu përgëzimet lidhur me organizimin nga ana e Shqipërisë të Forumit të Biznesit dhe Ministerialit të datës 26 shtator, ndërsa theksoi rëndësinë e madhe të procesit të Berlinit për vendet e Ballkanit Perëndimor.
Becht tha se Franca mbështet integrimin e Shqipërisë në Bashkimin Europian dhe inkurajoi ministrin Mete në vijimin e reformave.
Kujtojmë se, bashkëpunimi ekonomik mes Shqipërisë dhe Francës ka njohur rritje në vitet e fundit. Prezenca e investimeve franceze në vendin tonë ka patur një trend rritës përgjatë viteve 2018-2022, duke shënuar vlerën më të lartë përkatësisht 445 milionë Euro në fund të vitit 2022. Sipas të dhënave, në territorin e Shqipërisë janë aktive 433 kompani me pronësi franceze. Ndër to, 322 kanë kapital 100% të huaj, ndërsa 111 prej tyre kapital të përbashkët.
