Një gol me vlerë një derbi, por jo vetëm kaq: Federico Gatti fshiu imazhet e autogolit ndaj Sassuolos me golin që i dha avantazhin në ndeshjen shumë delikate ndaj Torinos. Në fund të fundit, mbrojtësi i Juventusit nuk është dikush që dorëzohet lehtë dhe këtë e dëshmon historia e tij.
Gatti është një djalë që është mësuar gjithmonë me sakrifica, që kur ishte murator dhe mbërriti në seancat stërvitore ende i mbuluar me bojë: “Isha murator dhe vendosja dritare dhe dyer, në mbrëmje stërvitesha në baltë, fusha të ngrira dhe i ftohti. Kam kaluar shumë përvoja pozitive dhe negative, gjithçka më ka ndihmuar të rritem dhe të bëhem personi që jam sot.
Do të kisha qenë i gatshëm të bëja gjithçka për të arritur atje, për të hequr dorë nga çdo gjë, për të luftuar kundër gjithçkaje dhe të gjithëve”, shkruan ai në rrjetet sociale pasi mbërriti në Pro Patria, puna e tij e parë si profesionist.
Kur ai luajti te Frosinone, drejtori sportiv Angelozzi e përkufizoi atë si “Një Chiellini me këmbët e Bonuccit”. Gatti, pak i zënë ngushtë, tha për Gazzetta: “Një krahasim i rrezikshëm, por Chiellini është futbollisti që më frymëzon për mentalitetin e tij. As ai nuk dorëzohet kurrë”.
Mbrojtësi shpesh krahasohet me Torricellin, i cili gjithashtu u detyrua të bënte shumë sakrifica për të arritur në krye: ai punoi si marangoz dhe luajti në Serinë D, dhe u vu re nga Juventus në një ndeshje miqësore.
Sakrifica dhe jetesë të shëndetshme. Këta janë çelësat e ngritjes së Gattit, i cili e nisi nga promovimi duke mbërritur në Serie A dhe më pas edhe në kombëtare:
“Gjithmonë jam kujdesur për trupin tim me ushqimin e duhur, ndihem si viking, nuk dorëzohem kurrë ”, tha ai në lidhje me dietën e tij. “Nuk mjafton të luash mirë nëse dëshiron të rritesh, por ajo që të bën të dallosh është koka jote, nuk duhet të jesh kurrë i kënaqur” -shtoi 25-vjeçari Gatti.
Gatti është shumë i rezervuar, përdor pak rrjetet sociale (edhe pse ka gati 400 mijë ndjekës) dhe zakonisht ngarkon vetëm foto me fanellën e Juventusit. Ndër pasionet e tij janë edhe tatuazhet, ndër të cilat një shumë evident në krahun e majtë: “Të gjithë i janë kushtuar familjes sime, rrugës së jetës. Unë jam një fëmijë i vetëm, por shpresoj të kem shumë fëmijë”.
