Kombëtarja shqiptare e futbollit ka fituar mbrëmë me shifrat 3-0 ndaj Çekisë. Në këtë mënyrë ka hedhur hapin më të rëndësishëm drejt kualifikimit në Euro 2024.
Tashmë kuqezinjtë kryesojnë grupin me 13 pikë dhe më 4 pikë diferencë ndaj ndjekëses më të afërt që është Polonia. E tani mund të bëhen më lehtësisht llogaritë dhe të gjitha kombinimet e mundshme që çojnë kuqezinjtë në Europian.
Për të qenë matematikisht të sigurt në Gjermani në verën e ardhshme, djemve të drejtuar nga Sylvinho u mjafton vetëm një pikë në dy ndeshjet e mbetura. Kjo për faktin se në çfarëdo lloj kombinimi rezultatesh të sfidave të tjera, është e pamundur që të gjitha ekipet ndjekëse të bëjnë më shumë se 14 pikë.
Dhe duke pasur parasysh se me Çekinë dhe me Poloninë kemi golavarazh më të mirë në ndeshjet direkte, Shqipëria do të shkonte qetësisht në fazën tjetër të turneut edhe me të njëjtat pikë me ta.
