Ministrja e Shëndetësisë dhe Mbrojtjes Sociale, Albana Koçiu zhvilloi një takimin me stafin e Spitalit Rajonal të Shkodrës, me të cilët ka dikutuar mbi ecurinë e punëve, si dhe ka dëgjuar sugjerimet dhe sfidat që kanë të bëjnë me prioritetet e punës së përditshme të personelit për rritjen e cilësisë së shërbimit shëndetësor për qytetarët.
Ministrja Koçiu në një postim në rrjete sociale u shpreh se, pas rigjenerimit të fasadës me sistem kapot për përdorimin eficent të energjisë, mbështetja e qeverisë për Spitalin Rajonal të Shkodrës do të vijojë me sistemimin e mëtejshëm të mjediseve të jashtme si dhe pajisjen me aparaturat mjekësore të teknologjisë më të fundit.
Gjatë vitit 2022 janë trajtuar rreth 87 mijë urgjenca mjekësore dhe 78 mijë vizita ambulatore, si dhe janë kryer rreth 4200 ndërhyrje kirurgjikale nga ky staf mjekësor, duke e shndërruar këtë spital në një pikë referimi për të gjithë veriun e vendit.
