Ndërtimi i ish-kompleksit të klubit ‘Partizani’ shkaktoi ‘furtunë’ në familjen Berisha, ku para pak ditësh, SPAK ju drejtua GJKKO-së me kërkesë për caktim mase sigurie ndaj kryedemokratit dhe dhëndrit Jamarbër Malltezi.
Pjesë e skemës për të përfituar nga kjo çështje ishte edhe ortaku i Malltezit, Fatmir Bektashi. Ndërsa, në thelb të kërkesës nga SPAK ishte akuza për korrupsion pasiv ndaj zyrtarëve të lartë.
Dosja voluminoze e hetimeve prej 200 faqesh përmban dhjetëra dokumente, dëshmi dhe kërkime në shumë institucione. Aso kohë, kreu i grupit parlamentar të PS-së, Taulant Balla në 2020 kallëzoi në SPAK çështjen dhe pas 3 vitesh prokurorja Enkeleda Millonaj dha ‘OK’ për të bërë përgjegjës, Berishën, dhëndrin dhe ortakun e tij.
Në dosje zbulohet se Berisha ka shfrytëzuar postin e kryeministrit për të favorizuar dhëndrin e tij, madje ka vënë në lëvizje edhe ministrat e tij në favor të Jamarbër Malltezit.
Megjithatë, në këtë ’skemë’ një rol vendimtar ka luajtur edhe kryeministri Edi Rama, aso kohe kryetar i KRRT-së së Tiranës, i cili nuk është përmendur në asnjë paragraf të dosjes me 200 faqe.
Në dokument, rezulton se me firmën e tij, Edi Rama i ka hapur rrugë ndërtimit të kullave në ish-kompleksin Partizani, mirëpo SPAK nuk e ka prekur.
Në shkresën e lejes së ndërtimit, që mban datën 29 dhjetor 2007 thuhet:
“KRRT e Tiranës me vendimin me numër 136 datë 29 dhjetor 2007 miratoi sheshin e ndërtimit, destinacionin e funksionit të tij dhe kondicionet, shesh ndërtimi për godinë banimi dhe shërbime, 5,7 dhe 9 kate dhe 2 kate parking nëntokësor në rrugën “Frosina Plaku”, thuhet në dosje.
Po ashtu, në dokument shkruhen edhe emrat e pronarëve përfitues të pronës dhe në fund emri i Edi Ramës dhe Sekretarit të KRRT, Dritan Agolli.
