Ministrja e Shëndetësisë dhe Mbrojtjes Sociale, Alban Koçiu mori pjesë sot në aktivitetin “Jo Feminicidit! Bashkë kundër dhunës me bazë gjinore”, organizuar nga Kuvendi i Shqipërisë.
Ministrja Koçiu e nisi fjalën e saj me lajmin e miratimit në mbledhjen e Këshillit të Ministrave të Plan Veprimit në zbatim të Rezolutës 1325 së Këshillit të Sigurimit të Organizatës së Kombeve të Bashkuara, “Gruaja, paqja dhe siguria”.
Duke e cilësuar një lajm të mirë miratimin e këtij Plan Veprimi, Koçiu u shpreh se “është një angazhim i qeverisë shqiptare që tashmë do të jetë në agjendën, tryezën e çdo institucioni për të çuar akoma më tej barazinë gjinore në një nivel tjetër duke e përfshirë atë më me forcë në sektorë të rëndësishëm, si ai i mbrojtjes, sektori i rendit, në misione paqeruajtëse, por edhe jashtë”.
Sipas saj, me këtë plan, i jepet gruas roli që meriton, një rol kyç sa i përket demokracisë, ruajtjes së rendit, paqes dhe stabilitetit në vendin tonë dhe në botë.
“Jemi në drejtimin e duhur për t’i dhënë gruas, vajzës forcën edhe zërin e duhur në shoqërinë tonë”, deklaroi ministrja.
“Duke patur në fokus mirëqënien e grave dhe vajzave, jemi duke financuar prej disa vitesh tashmë nëpërmjet Fondit Social, shërbime me bazë komunitare që shtrihen kryesisht në pushtetin vendor së bashku me organizatat e shoqërisë civile, por jo vetëm, edhe me bashkitë e vendit për të ofruar akoma më shumë shërbime këshilluese, integruese të formimit profesional, të strehimit në raste emergjence apo krize për të gjitha vajzat edhe gratë të cilat janë për fat të keq viktima të dhunës apo abuzimit seksual”, nënvizoi Koçiu.
Ajo vuri në dukje se me buxhetin e vitit 2024, Ministria e Shëndetësisë dhe Mbrojtjes Sociale do të vijojë të mbështesë rritjen e mbrojtjes sociale.
“Për fat të mirë kemi një buxhet të rritur edhe për pjesën e mbrojtjes sociale dhe do të vijojmë të mbështesim shërbime të tilla sidomos për t’i dhënë gruas akoma më shumë zë, akoma më shumë forcë, për të qenë të gjitha bashkë dhe për të bërë akoma më shumë”, përfundoi ministrja Koçiu.
