Jeta e Anjeza Sanços dhe Melsi Aliajt do të ndryshonte përgjithmonë në momentin që ata vendosën të birësonin një fëmijë dhe ditën që ata morën për vogëlushen me emrin Ema.
Të dy janë profesionistë në fusha të ndryshme, Anjeza me një karrierë prej 20 vitesh në sektorin bankar dhe Melsi në fushën e IT-së, tashmë ndjehen të bekuar dhe të lumtur që janë bërë prindërit e Emës, vogëlushes e cila deri para një viti ishte nën përkujdesjen e stafit të Shtëpisë së Foshnjës Hana dhe Rozafa.
Në kuadër të festave të fundvitit dhe Ditës Ndërkombëtare të Solidaritetit Njerëzor, ministrja e Shëndetësisë dhe Mbrojtjes Sociale, Albana Koçiu zhvilloi një vizitë në shtëpinë e tyre e cila, siç dhe shprehen ata, ka marrë ngjyra të tjera që sapo Ema është bërë pjesë e jetës së tyre.
Sipas saj, kjo familje e mrekullueshme është frymëzim edhe për çiftet e tjera që dëshirojnë të kenë një fëmijë dhe t’u japin dashuri dhe siguri për të ardhmen e tyre.
“Eksperienca më e bukur e jetës time. Është një ëndërr e bërë realitet për të dy ne. Mezi e kemi pritur. Sot më duket sikur ka kaluar shumë pak kohë”, shprehet Anjeza e cila rrëfen se nuk do ta harrojnë kurrë ditën e parë që takuan Emën.
“Ema ka një buzëqeshje të paparë dhe ne sapo pamë buzëqeshjen ndamë mendimin se ajo ishte”, – u shpreh nëna e vajzës në bashkëbisedim me ministren Koçiu.
Anjeza thekson se “të sjellësh në jetë një fëmijë është bekim por patjetër që në momentin që ti nuk e ke atë mundësi ti japësh jetë ti japësh familje një fëmije që ekziston sot në këtë botë është një mundësi e dytë për ty që nuk e sjell dot vetë, por një mundësi e dytë edhe për fëmijën që është në këtë botë dhe që duhet të përballet me shumë sfida dhe pse jo me një familje të kompletuar që i ka mundësitë”.
Ministrja e Shëndetësisë dhe Mbrojtjes Sociale, Albana Koçiu deklaroi se “fëmijët janë prioritet i yni, ku tashmë me forcimin e kritereve dhe zgjatjen e procedurave nga qeveria shqiptare për birësimin e një fëmije përbëjnë kusht kryesor si për mirërritjen e tij ashtu edhe për gjetjen e familjes që garanton mirëqenien e tyre”.
Koçiu ka nënvizuar se deinstitucionalizimi për fëmijët pa kujdes prindëror është prioritet i MSHMS-së, por edhe një çështje që na përket të gjithëve pasi çdo fëmijë meriton një familje që të rritet i lumtur dhe i rrethuar me dashuri.
“Synimi ynë do të vijojë të jetë ulja e numrit të fëmijëve në institucione dhe sigurimi i një mjedisi familjar për këta fëmijë”, ka deklaruar ministrja Koçiu.
