Premier League e futbollit në Angli vijon të jetë në javën e 19-të. Boxing Day nuk rezervoi surpriza mbrëmjen e së mërkurës, me Wolves, Chelsea dhe Manchester City që fituan.
Në “Stamford Bridge” Chelsea fitoi 2-1 me Crystal Palace në derbin e Londrës, teksa golat për Blutë u shënuan nga Mudryk dhe Madueke, teksa Palace barazoi përkohësisht me Olise. Në fushë për Chelsean luajti 20 minutat e fundit edhe Armando Broja, që ishte në fushë në momentin kur u shënua goli i fitores për të tijtë. Chelsea me 25 pikë mban vendin e dhjetë.
Në “Goddison Park”, Everton nuk mundi të mbante rezultatin e pjesës së parë, me golin e Harrison që i dha suksesin në 45 minutat e para. Manchester City e përmbysi 1-3 me gola të Foden, Alvarez dhe Bernardo Silva. City me 37 pikë ngjitet në pozitën e katërt.
