Ministrja e Shëndetësisë dhe Mbrojtjes Sociale, Albana Koçiu, ishte këtë të dielë në Gjirokastër, nga ku u takua dhe me të moshuarit e qytetit të gurtë, teksa theksoi se po punohet për shërbimin shëndetësor në banesë për pensionistët.
Ministrja Koçiu, duke publikuar një video në rrjetet sociale, nga takimi, njofton dhe nisjen e punimeve në spitalin rajonal të Gjirokastrës.
“Me Mirela Kumbaro Furxhi dhe Flamur Golemi u takuam në një bisedë të ngrohtë me miq gjirokastritë në pension të cilët janë edhe përfitues të shërbimeve mjekësore e paketave shëndetësore falas, për të diskutuar për nevojat e tyre dhe për t’u konsultuar mbi çfarë mund të bëjmë më shumë!”, shkruan Koçiu.
Sipas saj, “rikonstruksioni i spitalit të Gjirokastrës që fillon brenda këtij viti është po ashtu lajm i mirë në mozaikun e shërbimeve socio-shëndetësore për më të moshuarit”.
Ndërkohë, në videon e publikuar, gjatë bashkëbisedimit me qytetarët, Ministrja e Turizmit Kumbaro rrëfeu vëmendjen e shtuar të qeverisë për qytetit e gurtë. “Unë kam kënaqësinë shumë të madhe që bashkë me ju, bashkë me gjirokastritët dhe gjirokastritet, por libohovitët këtu… Këtu kemi sot një mikeshë shumë të mirë që është Ministrja e Shëndetësisë dhe Mbrojtjes Sociale që kishte që kur mori detyrën, Albana një mikeshë shumë e mirë, një familjare që edhe punën e konsideruar si familje, prandaj mendova që ishte më e udhës që të takoheshim në formën e takimit familjar. Albana, që kur mori detyrën në shtator më thoshte kur do shkojmë në Gjirokastër dhe ja ku jemi…”, është shprehur Kumbaro.
“Sapo vijmë nga spitali i Gjirokastrës, për të cilin kemi një lajm të mirë, kemi rikonstruksionin e godinës së spitalit. Këtë vit nis rikonstruksioni dhe me rikonstruksionin do të fuqizohet flota e pajisjeve dhe burimeve njerëzore për të ofruar shërbime akoma më të mira dhe më cilësore për të gjithë qytetarët e Gjirokastrës dhe qarkut në tërësi. Dhe po ashtu për të gjithë turistët, apo vizitorët e këtij qyteti të bukur, të cilët do të kenë nevojë për askses në shëndetësi”, tha Koçiu.
Ajo premtoi se po vijojnë përpjekjet për kujdes shëndetësor në shtëpi për të moshuarit. Sipas saj ky shërbim aktualisht ofrohet në 131 qendra shëndetësore, por do përhapet në të gjithë vendin.
“Kemi fishat e diabetit që i ofrojmë falas dhe ka një seri shërbimesh që ofrohen 100% falas. Ne po bëjmë një përpjekje, që për të moshuarit të ofrohet shërbimi në banesë. Çdo lloj nevojë që do kenë të moshuarit, për analiza, vaksina, etj.të bëhen në banesë, jo të qëndrojnë në radhë nëpër qendrat shëndetësore…etj. Pra ata që do kenë nevojë të bëjnë një kontroll në banesë, ta bëjnë. 131 qendra shëndetësore e aplikojnë, Jemi duke punuar dhe po përpiqemi që ta ofrojmë këtë mundësi në të gjithë qendrat shëndetësore të vendit”, tha Koçiu.
