Një shtetas shqiptar, ish-pjesëtar i klanit Skaljar, Edmond Mustafa është vrarë mëngjesin e sotëm në Tivar të Malit të Zi.
Lidhur me ngjarjen, është vënë në pranga autori i dyshuar i krimit, Dino Ibrahimoviç.
Prokurorja e Prokurorisë së Lartë të Shtetit në Podgoricë, Irena Buriç, e cila po udhëheq hetimet, ka konfirmuar se është arrestuar Ibrahimoviç, i cili dyshohet për vrasje dhe posedim pa leje të armëve dhe lëndëve shpërthyese, pasi iu gjet një çantë me një pushkë automatike.
Prokurorja tha se për momentin nuk mund të flasë për motivin, por shtoi se hetimet mbi rastin vijojnë.
“Kam kryer një hetim në vend të ngjarjes së bashku me zyrtarët e Qendrës së Sigurisë së Tivarit dhe ekspertët e Qendrës Mjeko Ligjore Danilovgrad, nga vendi i ngjarjes janë marrë gjurmë që do të jenë objekt i ekspertizës së mëtejshme”, tha prokurori para gazetarëve.
Kujtojmë se Policia rrethoi qytetin pas të shtënave, ndërsa dëshmitarët okularë nga restorantet në rrugën Marsala Tita thanë se dëgjuan disa të shtëna dhe viktima ishte i shoqëruar nga një grua në momentin vrasjes.
Një nga dëshmitarët okularë ka thënë për mediat se kanë dëgjuar pesë apo gjashtë të shtëna dhe kur janë ndalur, disa prej tyre kanë dalë në parking dhe kanë parë viktimën të shtrirë mes dy makinave të parkuara.
