Sot u fal namazi i Bajramit në sheshin “Skënderbej” ku mijëra besimtarë u mblodhën për t’u lutur pas 30 ditëve agjërim. Numri i lartë i besimtarëve ka bërë që shumica prej tyre të mos kenë tapete për tu falur duke përfunduar mbi gazeta të blera në shesh nga shitësit ambulantë. Kjo nuk është hera e parë që ndodh gjatë faljes së Bajramit duke bërë që kjo situatë të përsëritet çdo Bajram.
Pikërisht për këtë situatë ka reaguar edhe gazetari Ermal Vaka i cili ka publikuar në rrjete sociale pamje të besimtarëve që falen mbi gazeta. Gazetari është shprehur i revoltuar për mënyrën se si po trajtohen besimtarët myslimanë duke shprehur shqetësimin për mungesën e tapeteve dhe duke ofruar ofruar si alternativë edhe kontributin e besimtarëve nëse problemi qëndron te mungesa e fondeve.
Më poshtë ndjekim statusin e gazetarit
Falja e Bajramit përtej festës …
Më duket e turpshme, tallëse deri në fyese fakti që besimtarët myslimanë detyrohen të falen në fleta gazetash apo rrobe të marra me vete. Ne myslimanët nuk e kemi problem të falemi në pllaka, mund të falemi kudo dhe të përulemi para Allahut por pse ne trajtohemi në këtë mënyrë? A është kjo e qëllimshme?
Nuk besoj se mungojnë fonde për disa tapete më shumë apo dhe dëshira e besimtarëve për të kontribuar për blerjen e tyre (nëse realisht ka mungesa fondesh).
Sot mijëra besimtarë u falën në gazeta (gjë që deri diku është e ndaluar në fenë islame për shkak të figurave që mund të mbartin ato fletë) vetëm për shkak të mosdëshirës së plotësimit të kushteve të besimtarëve.
Po falemi në rrugë se nuk kemi xhami, po falemi pa tapeta, nëpër pllaka por kjo nuk step asnjërin prej myslimanëve. Ka dasht Zoti besimtarët po shtohen çdo ditë pavarsisht të gjithave. Nuk po kërkojmë asgjë, por një falje në mënyrë denjitoze besoj e meritojmë.
Allahu ju ruajt dhe ua pranoftë lutjet tuaja! Gëzuar Fitër Bajramin!
