Kryetari i Partisë së Lirisë, Ilir Meta me anë të një postimi ne rrjetet sociale ka shprehur hapur mbështetjen e tij ndaj partisë opozitare VMRO-DPMNE, e cila sipas tij do të jetë fituesja në zgjedhjet e ardhshme në Maqedoninë e Veriut.
Meta shkruan se ka qenë pikërisht kjo parti, e cila kur ka qenë në pushtet me vizionin dhe politikat e Gruevskit, e shndërruan Maqedoninë, vendin e 10-të në botë dhe të 5-të në Europë për klimën e biznesit dhe investimet e huaja.
Ai shton se ekipi i ri i kësaj partie ka mësuar mjaftueshëm nga gabimet e bëra në të kaluarën, duke theksuar faktin se vendi fqinj do të vijojë i sigurt rrugën për integrimin euroatlantik, dhe se një garanci kyçe për këtë, pa dyshim që do të jenë shqiptarët.
Postimi i plotë:
Fitorja e pritshme e VMRO-DPMNE në zgjedhjet e afërta do t’i japë një dimension të ri zhvillimit ekonomik të Maqedonisë së Veriut në të ardhmen nga i cili do të përfitojnë të gjithë qytetarët e saj.
Të mos harrojmë se vizioni dhe politikat e saj në qeverisje e shndërruan Maqedoninë e Veriut, vendin e 10-të në botë dhe të 5-të në Europë për klimën e biznesit dhe investimet e huaja.
Falë vizionit të VMRO-DPMNE, Maqedonia e Veriut shpërtheu për rritjen e bujqësisë dhe blegtorisë duke e nisur me 10 milionë euro financim në vit e duke e çuar në 200 milionë euro.
Ekipi i ri i VMRO-DPMNE besoj se ka mësuar mjaftueshëm nga gabimet e bëra në të kaluarën dhe pasojat e nepotizmit, të cilat eklipsuan arritjet e jashtëzakonshme ekonomike dhe sociale.
Maqedonia e Veriut do të vazhdojë të ecë e sigurt në rrugën euro-atlantike dhe përsëri shqiptarët do të jenë garancia kyçe për këtë!
