Avokati Sokol Mëngjesi i dhunuar ditën e djeshme në zonën e ish-bllokut vijon të jetë në gjendje të rëndë në sallën e Reanimacionit në Spitalin e Traumës në kryeqytet, ku po mbahet në monitorim. Mëngjesi u dhunua nga tre persona të identifikuar nga policia si: Dorian Alia, Elton Kasaj dhe Drivaldo Aliaj.
Edhe nga pamjet e kamerave të sigurisë të siguruara nga Report Tv, avokati u godit fillimisht me dorezë hekur në fytyrë sapo doli nga kopshti nr.31 në ish-bllok, ku la fëmijën e tij, e më pas ra përdhe pa ndjenja, teksa autorët vijuan ta godasin me shkelma.
Mendohet se ai mund të ketë përplasur kokën në trotuar teksa ka rënë dhe kjo mund t’i ketë shkaktuar dëmtime edhe më të rënda në kokë.
Ndërsa Romario Tabaku ka siguruar largimin e tre dhunuesve nga vendngjarja.
Pasditen e djeshme, u vetëdorëzua njëri prej dhunuesve në DVP e Tiranës, Dorian Alia, ndërsa policia vuri në pranga porositësin e dhunës ndaj avokat Mëngjesit, Dritan Nano. Tre personat e tjerë janë në kërkim nga policia.
Siç bëri me dije drejtori i Policisë së Tiranë, Tonin Vocaj në një deklaratë për mediat ditën e djeshme, goditja ndaj Mëngjesit erdhi për shkak të detyrës.
Mëngjesi përfaqësonte një familje në një çështje prone, të cilën e kishin fituar në proces gjyqësor në Shkallën e Parë dhe në Apel, por njëri prej pjesëtarëve të familjes nuk ka pranuar të paguajë Mëngjesin sipas kontratës.
Kjo mosmarrëveshje ka shkuar deri në dhunimin e avokatit i cili nuk ishte tërhequr ndaj detyrimeve kontraktuale që kishte lidhur me njërin prej familjarëve që rezulton të jetë Dritan Nano, i cili me anë të lidhje farefisnore porositi dhunën.
