Në datën 14 qershor në orën 21:00 Gjermania pret Skocinë për të nisur emocionet e ndeshjes hapëse të Europianit 2024. Dy ditë larg nga nisja e këtij eventi Italia kampione në fuqi, kundërshtare e Shqipërisë, ka “zbritur nga froni”.
Prestigjozja Eurosport, duke analizuar futbollistët si dhe gjendjen aktuale të 24 skuadrave pjesëmarrëse, ka bërë një projeksion se si do të jetë renditja finale e skuadrave.
Për vendin e parë, sipas Eurosport nuk ka dyshime; Franca e Didier Deschamps mbetet favoritja absolute për të fituar trofeun. 8 nga 12 gazetarët e redaksisë së “Eurosport” e shikojnë Francën si favoriten kryesore të këtij evropiani.
“Gjelat” e kërkojnë këtë trofe prej 24 vitesh, teksa i’u afruan shumë në 2016, ku në shtëpi i surprizoi Portugalia e Cristiano Ronaldos. Antagonistja kryesore e Francës është Anglia e Gareth Southgate.
Në linjën e dytë të pretendentëve janë Gjermania, vendi pritës i këtij Evropiani, drejtuar nga Nagelsmann dhe Spanja e De La Fuentes, rivali i kombëtares tonë.
Ndërkohë Italia e Spallettit, rivali tjetër i kombëtares tonë në Grupin B, shikohet vetëm në vendin e 6 dhe mundësia për të përsëritur suksesin e Evropianit të shkuar shikohet thuajse e pamundur.
Pjesa më e madhe e gazetarëve të “Eurosport” parashikon se “Azzurrët” do të eleminohen përpara raundit të gjysmëfinaleve.
