Kapiteni i Ko mbëtares italiane, që mori kurorën e mbretëreshës së Europës në stadiumin “Uembli” më 11 korrik 2021, Xhorxho Kielini, tanimë është një ndër vëzhguesit e kujdesshëm të turneut në Gjermani. Dhe për një figurë me eksperiencën e Kielinit ndeshjet e fundit të grupit të ferrit, në të cilin bën pjesë Italia, por edhe Shqipëria, Spanja e Kroacia, verdiktet duket se janë vulosur që pas 180 minutave të para.
Dhe për sa i përket dueleve të mbrëmjes së sotme, ish-kapiteni i Juventusit dhe i Italisë ka bindjen e tij: “Që Spanja do të ishte e para e këtij grupi kjo pritej, duke parë faktin e punës së bërë nga ata ndër vite, edhe pse në Europianin e fundit ne morëm ndoshta fitoren tonë më të rëndësishme për të arritur në fund te trofeu.
Pas Enrikes, ata morën De La Fuenten, i cili ka rritur shumicën e brezit aktual të Spanjës, kështu që ishte normale dhe një vazhdimësi pozitive.
A ka shanse Shqipëria ndaj Spanjës?
“Në varësi të kombinimeve dhe rezultateve që mund të lidhen me grupet e tjera, ndoshta kanë 1 për qind shans për fitore, por përballë Spanjës, më vjen keq, por Shqipëria nuk ka asnjë shans që të fitojë. Me pikën e marrë ndoshta do të presin fundin e grupeve, për të shpresuar si një ndër 4 të tretat më të mira, por ndaj Spanjës nuk i jap asnjë shans”, u shpreh ai.
Po Kroaci-Itali?
Ndeshje e fortë, por mendoj se kroatët pas shumë gjërave të mira në Europianët e Botërorët e fundit tashmë kanë hyrë në një fazë rindërtimi dhe besoj se fiton Italia, kjo edhe për faktin se duan që të përgjigjen pas humbjes me Spanjën” tha Kielini.
Lidhur me faktin nëse te Italia ekziston një Kielini i ri, “King Kongu” zgjedh Alesandro Bastonin, autorin e golit të barazimit ndaj Shqipërisë si pasardhësin e tij.
“Alesandro Bastoni është mbrojtësi i së ardhmes, madje teknikisht është shumë herë më i mirë sesa unë. Ka pak futbollistë në botë që i afrohen cilësive të Bastonit, një lojtar që edhe duke luajtur në një mbrojtje me 3 veta bën gjithmonë diferencën. Në të njëjtën kohë, di që të jetë shumë i rrezikshëm edhe në fazën sulmuese, për të mos folur pastaj për qetësinë që transmeton në fushë, duke qenë aq i ri”, përfundoi Kielini.
