Ministrja e Arsimit dhe Sportit, Ogerta Manastirliu, priti sot dy maturantet, dy vajza të jashtëzakonshme, të cilat, falë punës së palodhur dhe sistematike arritën të kenë rezultate e shkëlqyera në provimet e Maturës Shtetërore, me 10 absolute në të gjitha provimet, si dhe gjatë të gjithë viteve të gjimnazit.
Ato janë dy maturantet Sara Kola nga gjimnazi “Ismail Qemali” Tiranë dhe Pranvera Ahmeti nga gjimnazi “Hasan Tahsini” në Sarandë.
“Jam shumë krenare për ju vajza që keni marrë rezultatet maksimale në provimet e maturës gjithashtu edhe përgjatë viteve të shkollës. Ju keni bërë krenarë prindërit dhe mësuesit tuaj, të cilët bëjnë një punë shumë të mirë dhe dua t’i falënderoj jo vetëm mësuesit tuaj por të gjithë mësuesit tanë për punën që bëjnë. Ju i bëni krenar sepse shohin sesi puna e tyre është kurorëzuar. Ju jeni shembull për të gjithë shokët tuaj”, tha Ministrja Ogerta Manastirliu në takimin që u zhvillua në Ministrinë e Arsimit dhe Sportit.
Sara Kola, ka treguar se ka lindur dhe është rritur në Itali, dhe në moshën 9-vjeçare është transferuar në Lezhë. Prej vitit 2019, ajo jeton në Tiranë ku ka ndjekur dhe gjimnazin “Ismail Qemali” si pjesë e seksionit dygjuhësh italo-shqiptar. Përpos hapjes së madhe kulturore në seksion, një element shumë i rëndësishëm në formimin e saj kanë qenë aktivitetet e shumta jashtëshkollore. Për Sarën të arrish rezultate maksimale është shumë e rëndësishme dhe është një shpërblim i punës së palodhur, por nota për të nuk është më e rëndësishmja.
“Të arrish rezultate maksimale është shumë e rëndësishme dhe është një shpërblim i gjithë punës së palodhur por nota nuk është më e rëndësishmja kështu që dhe ata që ndoshta nuk kanë marrë 10.00, që kanë punuar shumë janë zhgënjyer sepse mund të ndodhë se ai një provim është mund të mos ndjehesh mirë atë ditë. Njeriu është shumë më tepër sesa kaq dhe për sa kohë ke dhënë maksimumin tënd dhe ke ndjekur pasionet e tua ndërkohe kë ndenjur me njerëzit që do dhe ke kaluar kohë cilësore unë nuk shikoj motiv që ti kushtosh aq rëndësi notës.”, ishte mesazhi i saj për të gjithë maturantët.
Pranvera Ahmeti nga gjimnazi “Hasan Tahsini” në Sarandë e cila preferon lëndët shkencore fizikë, biologji dhe kimi duke se e ka bërë zgjedhjen e saj për të ardhmen.
“Dua të them që na kanë ndihmuar shumë testet model. Kam punuar me to që në fillim e deri tani. Me vjen mirë që puna ime u shpërblye në fund dhe arrita të marr katër 10.00 në provimet e Maturës. Unë kam zgjedhur Mjekësinë e Përgjithshme dhe secili prej nesh ka ardhur momenti që të zgjedhë atë që do vërtet, profesionin që do të vazhdojë në universitet. Duhet të ndjekim zemrën tonë sepse zgjedhja që bëjmë tani është e ardhmja jonë,” u shpreh ajo.
Pranvera është fituese në Olimpiadën e Letërsisë dhe pjesëmarrëse në disa olimpiada të tjera, duke treguar prirje të veçanta në lëndët shkencore. Gjithashtu, ajo është pjesë e Klubit shkollor të Shkencave të Natyrës, duke u bërë pjesë e eksperimenteve të ndryshme.
