Një hap i rëndësishëm është hedhur në fushën e artit, kulturës dhe ekonomisë kreative në Shqipëri, me nënshkrimin e Memorandumit të Mirëkuptimit mes Ministrisë së Ekonomisë, Kulturës dhe Inovacionit dhe British Council.
Pjesëmarrës në ceremoninë e firmosjes së Memorandumit, ishte edhe Ambasadorit Britanik, Z. Alastair King-Smith, ekspertë të fushës dhe përfaqësues të Ministrisë së Ekonomisë, Kulturës dhe Inovacionit.
Marrëveshja do të fokusohet në hartimin e politikave, kërkime dhe avokim në sektorin e ekonomisë kreative dhe ngritjen e kapaciteteve për profesionistët krijues dhe politikëbërësit, duke siguruar që individët dhe organizatat në fushën e industrisë kreative të rriten, të arrijnë potencialin e tyre dhe të bëjnë një ndryshim të qëndrueshëm dhe të përshtatshëm.
Fushat specifike në të cilat do të bashkëpunohet janë filmi, muzika, artet pamore, teatri, lojërat, trashëgimia kulturore, arkitektura, moda dhe deri te sektorët në zhvillim si teknologjia digjitale dhe dizajni.
Zyrtarizmi i kësaj marrëveshje bashkëpunuese, e para mes MEKI dhe British Council, do të shtrihet për një periudhë 3-vjeçare, nga viti 2024 deri në vitin 2027.
Me firmosen e kësaj marrëveshje, në vendin tonë do të sillet edhe përvoja dhe ekspertiza British Council mbi industrinë kreative që shihen gjithnjë e më shumë si një komponent jetik i rritjes ekonomike globale, pasi zvogëlon pabarazitë dhe nxit inovacionin. Ky sektor përfshin rreth $2 trilion dhe krijon 50 milionë vende pune në mbarë botën, duke përfshirë shumë gra dhe të rinj. Çdo $1 i shpenzuar krijon $2.5 pasuri për ekonominë që mund të përbëjnë 2-7% të PBB-së.
British Council, si një organizatë ndërkombëtare e Mbretërisë së Bashkuar me fokus në mundësitë e arsimimit dhe marrëdhëniet kulturore, ka operuar në Shqipëri në fushën e artit dhe kulturës për 30 vitet e fundit.
