Sir Elton John foli për rrugëtimin e tij drejt suksesit në Festivalin e Filmit në Nju-Jork, më 1 tetor 2024. Artisti 77-vjeçar bëri një paraqitje surprizë për premierën në SHBA të dokumentarit të tij “Elton John: Never Too Late”.
Në skenë, John këndoi “Tiny Dancer” ndërsa luante në piano. Më vonë, ai reflektoi për jetën dhe karrierën e tij të jashtëzakonshme duke mbajtur një fjalim të përzemërt. Duke filluar fjalimin e tij, ai ndau gëzimin e tij me audiencën duke thënë:
“Nuk e kam ndjerë kurrë lumturinë deri tani. Unë jam 77 vjeç, kam bërë gjithçka që kam për të bërë… Kur u bëra i suksesshëm në ato pesë vitet e para, ishte e mrekullueshme. Ishte gjithçka që doja. Doja që njerëzit t’i donin këngët, të blinin disqet”, tha ai.
Duke reflektuar mbi dashurinë e tij për muzikën dhe se si e ndihmoi ajo gjatë ditëve të tij të zymta, ai pohoi:
“Ka pasur gjithmonë muzikë në kohët e mira dhe të këqija. Unë gjithmonë jam mbështetur te muzika për të vazhduar përpara. Edhe kur isha në kohët e mia më të errëta, unë ende luaja muzikë, ende regjistroja muzikë, kështu që më duhet të falënderoj muzikën që ishte frymëzimi më i jashtëzakonshëm për mua gjatë gjithë jetës sime,” tha John.
Artisti zbuloi gjithashtu se një ndryshim drastik erdhi në jetën e tij kur ai la drogën dhe alkoolin në vitin 1990.
“Fillova të kuptoja se çfarë i mungonte jetës sime: përulësia, mirënjohja dhe besimi. Më duhej të ndërtoja një themel. Po, muzika është e mrekullueshme. Fama është e mrekullueshme. Por nuk më kënaqi. Diçka mungonte.”
Për më tepër, këngëtari ka pranuar se ka gjetur lumturinë e vërtetë me bashkëshortin e tij, David Furnish dhe fëmijët e tyre.
