Një sherr i dhunshëm mes dy burrave me origjinë shqiptare ka ndodhur në via Padova, në Milano të Italisë, duke lënë të plagosur njërin prej tyre.
Sipas mediave italiane, ngjarja ka ndodhur rreth orës 4 të mëngjesit të së dielës, ku sipas hetimeve, dy personat kanë nisur një konfrontim të ashpër i cili ka degjeneruar shpejt në dhunë, ndërsa ende nuk dihen ende arsyet e debatit.
Gjatë diskutimit të ashpër, një nga shqiptarët, një 32-vjeçar, ka nxjerrë armën. Gjatë përleshjes me bashkatdhetarin, arma është shkrepur aksidentalisht duke plagosur në këmbë pronarin e saj.
Menjëherë pas plagosjes në vendngjarje ka mbërritur policia së bashku me njësinë mjekësore, dhe 32-vjeçari i plagosur u transportua në spitalin San Raffaele, në Milano. Mësohet se ai është plagosur lehtë dhe ndodhet jashtë rrezikut për jetën.
Policia ka nisur tashmë procedurat për 32-vjeçarit, i cili tashmë do të përgjigjet për kanosje të rëndë dhe armëmbajtje pa leje.
