Kreshnik Çipi, i ftuar në një lidhje të drejtpërdrejtë me emisionin “Max Sport” në “Euronews Albania”, ka komentuar ndeshjen që Shqipëria zhvilloi kundër Çekisë në stadiumin “Air Albania”.
Ish-futbollist i kombëtares, kritikoi zgjedhjet taktike të trajnerit Silvinjo, veçanërisht për vendimin për të futur në fushë Taulant Seferin pas dëmtimit të Jasir Asanit.
Sipas Çipit, ish-mbrojtës i flamurtarit të viteve 80’, Seferi është një lojtar që kryen më shumë detyra mbrojtëse në krah, duke mos e ndihmuar ekipin për të shtuar ritmin në fazën sulmuese.
“Me hyrjen e Taulant Seferit, duket sikur trajneri ynë kërkonte më tepër barazimin. E vërteta është që Seferi shpesh kthehet me shpinë nga kundërshtari dhe me fytyrë nga porta jonë. Po ta vësh re, numrin më të madh të topave që merr, ai shkon drejt portës sonë në një kohë që duhet të shkojë drejt portës së kundërshtarit. Ndoshta duhej të futej Hoxha në vend të Seferit”, tha Çipi, duke sugjeruar një alternativë më sulmuese për ndeshjen.
