Kombëtarja shqiptare e futbollit ka mbyllur jo ashtu siç shpresonte këtë edicion të Ligës së Kombeve, teksa doli e fundit në Grupin B1 dhe rrëshqiti në Ligën C. Një edicion ku ra në sy se si loja e kuqezinjve ka lënë shpeshherë për të dëshiruar, por edhe ka krijuar varësi ndaj dy futbollistëve të paprekshëm për Silvinjon.
Kristjan Asllani dhe Ardian Ismajli dominojnë thuajse të gjitha statistikat që regjistron UEFA për ndeshjet e Ligës së Kombeve në këtë edicion, në fazën sulmuese e mbrojtëse. Duke filluar që nga golat, ku secili prej tyre ka gjetur një herë rrugën e rrjetës në 4 të tillë të shënuar në total.
Asllani është ai që ka tentuar më shumë herë portën, duke regjistruar plot 14 tentativa dhe duke lënë me diferencë të thellë mbrapa lojtarë të tjerë të mesfushës apo repartit të avancuar. Atë e ndjek Bajrami me 9, Laçi me 7 dhe Manaj me 5, të vetmit që kanë bërë më shumë se Ismajli i cili ka tentuar 4 herë portën.
Ai që ka tentuar më shumë pasime është përsëri Asllani, me 372 të tillë në 6 ndeshje, duke lënë pas Mitajn me 308 dhe Ismajlin me 284. Bajrami ia kalon për krosimet, me 23 të tillë të tentuar kundrejt 11 të Asllanit i cili mban vendin e dytë për këtë statistikë.
Te rikuperimet e topit është Ismajli i pari, me 37 të tillë, ndërsa Asllani mban vendin e katërt me 20. Por mesfushori është i pari për ndërhyrjet në top, me 15 të tilla në këto ndeshje. Ismajli “përgjigjet” me 35 spastrime të tentuara, përsëri në majë të listës. Dhe në fund, rezulton se Asllani është ai i cili ka marrë më shumë goditje nga kundërshtarët, me 16 faulle të pësuara, kundrejt vetëm 4 të shkaktuar në 6 ndeshjet e plota që ka luajtur në këtë edicion në Ligën e Kombeve.
Statistikat janë të qarta dhe duhet të bëjnë të mendohet Silvinjon për të ardhmen, pasi qartësisht, çdo gjë kalon mes këtyre lojtarëve sa i përket lojës kuqezi.
