Gjykata e Durrësit ka vendosur masën e sigurisë “arrest në shtëpi” për ish-juristin e Kadastrës së Durrësit Mikel Zaho.
Zaho akuzohet për shpërdorim detyre në bashkëpunim me 4 zyrtarë të Kadastrës për tjetërsimin e një sipërfaqeje toke në zonën e Spitallës në Durrës. Zaho ishte person në kërkim që nga muaji prill i këtij viti, pasi me kërkesë të Prokurorisë Gjykata kishte vendosur në mungesë masën e sigurisë “arrest në burg” për të. Sot gjykata dha masë sigurie të lehtësuar.
Hetimet e nisura që në vitin 2019 zbuluan një skemë për përfitimin e paligjshëm të 151 mijë metër katrorë tokë në Spitallë të Durrësit.
Rasti u rikthye në shkurt të vitit të kaluar pas denoncimit të një qytetari se toka e tij, ende në gjyq për njohjen e pronësisë në Gjykatën e Lartë, ishte zaptuar nga dy subjekte, njëri prej të cilëve pretendonte ta kishte blerë pronën nga një kompani tjetër.
Hetimet zbuluan shkelje të rënda në procesin e tjetërsimit të pronës. Për këtë rast u arrestuan në prill 5 persona, mes të cilëve dhe ish zyrtarë të Kadastrës. Hetimet tregojnë se procesi i tjetërsimit të pronës ka nisur në vitin 2019 nga juristi Mikel Zaho dhe është firmosur nga zëvendësregjistruesi, duke anashkaluar drejtuesin e atëhershëm të Kadastrës.
Tokat më pas janë shitur nga përfituesit, duke përdorur punonjës të ndërmarrjes bujqësore të Spitallës si dëshmitarë të rremë. Në këtë skemë janë përfshirë gjithashtu edhe persona të tjerë, që kanë qenë pjesë e zinxhirit të shkeljeve për tjetërsimin e pronave.
